धुळ्यातून धक्कदायक बातमी समोर आली आहे. जिल्ह्यातील एका गावात शेतकरी महिलेच्या डोक्यात लोखंडी सळईने घाव घालून निर्घृण हत्या करण्यात आली. या घटनेनंतर परिसरात एकच खळबळ उडाली आहे. दरम्यान एखाद्या चित्रपटातील गुन्हेगार गुन्हा केल्यानंतर पळून जातात तसाच या हल्लेखोरांनी देखील पळ काढला. मात्र ग्रामस्थांच्या सतर्कतेमुळे एका हल्लेखोराला पकडण्यात यश आले आहे.

मिळालेल्या माहितीनुसार, मृत महिलेचे नाव सुनिता बाबाजी बच्छाव (वर्षे ४०) असे आहे. त्या दिघावे ते पिसोळबारी रस्त्यालगतच्या शेतात पतीसोबत वास्तव्याला होत्या. काल बच्छाव यांच्या घराच्या मागे सुनीता यांचा मृतदेह छिन्न विछिन्न अवस्थेत सापडला. याप्रकरणी नागरिकांनी पोलिसांत तक्रार दाखल केली आहे.

दरम्यान, सुनिता बाबाजी बच्छाव यांच्यावर हल्ला करून काही हल्लेखोर पळून जात होते. यादरम्यान काही ग्रामस्थांना संशय आल्याने त्यांनी या हल्लेखोरांचा पाठलाग केला. ही धरपकड काही तासभर चालली मात्र अखेर ग्रामस्थांनी एका हल्लेखोराला पांढऱ्या रंगाच्या पिकअप व्हॅन मधून पळून जाताना पकडलं. आणि पोलिसांच्या ताब्यात दिल.

मात्र या महिलेची नेमकी कोणत्या वादातून हत्या करण्यात आली हे अद्याप स्पष्ट झालेलं नाही. तसेच हे हल्लेखोर कोण होते? ते सुनिता यांच्याकडे कोणत्या हेतूने आले होते याचा तपास पोलीस करत आहेत. ग्रामस्थांनी पकडून दिलेल्या संशयित हल्लेखोराची पोलीस कसून चौकशी करत आहेत. दरम्यान या घटनेने धुळ्यात तणावाचे वातावरण निर्माण झाले आहे.