Delhi Crime : दिल्लीमध्ये एक आगळीवेगळी घटना घडली आहे. दिल्ली पोलिसांनी रील पाहून आरोपींना अटक केली आहे. तपास करताना पोलिसांनी पीडिताचा मोबाइल चेक केला. त्यांना इन्स्टाग्राम अकाउंटवर रील दिसले. संशय आल्याने पोलिसांनी तपास केला आणि फक्त २४ तासांमध्ये दोन आरोपींना ताब्यात घेतले. ही घटना दिल्लीतील केशव पुरम पोलीस ठाण्याच्या परिसरात घडली आहे.

७ जानेवारी रोजी दिल्ली पोलीस कंट्रोल रुमला एक फोन आला. फोन करणाऱ्याने केशव पुरमच्या रामपूर परिसरातील एका घरातून दुर्गंध येत असल्याची माहिती दिली. घटनास्थळी पोहचल्यावर पोलिसांना अतिशय कुजलेल्या अवस्थेत एक मृतदेह आढळला. घरातील आधारकार्डवरुन मृत व्यक्तीचे नाव गोलू आहे असे स्पष्ट झाले. मृतदेह रुग्णालयात पाठवल्यानंतर पोलिसांनी गुन्हा दाखल करुन चौकशी सुरु केली.

डीसीपी भीष्म सिंह यांनी दिलेल्या माहितीनुसार, गोलूची हत्या करणाऱ्या मारेकऱ्यांना पकडण्यासाठी पोलिसांनी टीम तयार केली. पोलिसांनी सीसीटीव्ही फुटेज चेक केले. त्यांनी गोलूचा फोन तपासायला सुरुवात केली. दरम्यान इन्स्टाग्रामवर गोलूच्या रील्स पाहिल्या. बऱ्याच रील्समध्ये एक व्यक्ती होता. या व्यक्तीवर पोलिसांना संशय आला. त्यानंतर पोलिसांनी रील्समध्ये दिसणाऱ्या व्यक्तीचा शोध घ्यायला सुरुवात केली.

चौकशीदरम्यान, रील्समध्ये दिसणाऱ्या व्यक्तीचे नाव रंजीत असल्याचे पोलिसांनी समजले. हा रंजीत घरी नसून त्याचा मोबाईलदेखील बंद असल्याचे पोलिसांच्या लक्षात आले. सीसीटीव्हीमध्येही रंजीत दिसला होता. या सर्व प्रकारावरुन पोलिसांचा संशय वाढत गेला. त्यानंतर पोलिसांनी रंजीतला पकडण्यासाठी छापे मारले. छापेमारी केल्यानंतर पोलिसांनी रंजीत आणि त्याच्या साथीदाराला नीरजला अटक केली.

पोलिसांनी दोघांजवळ गोलूला मारण्यासाठी वापरण्यात आलेले हत्यार देखील सापडले. चौकशीदरम्यान नीरजने गुन्हा कबूल केला. 'नीरज आणि गोलू बऱ्याच वेळेपासून एकत्र काम करत होते. काम करताना गोलू नीरजला त्रास द्यायचा, त्याचा अपमान करायचा, शिव्या द्यायचा. गोलूने नीरजला मारहाण देखील केली होती. यावरुन रागात नीरजने मित्रासह गोलूची हत्या केली' अशी माहिती पोलिसांनी दिली.