उत्तर प्रदेशातील मैनपुरी जिल्ह्यातून एक हृदयद्रावक घटना घडली आहे. हुंड्याची मागणी पूर्ण न झाल्याने एका २१ वर्षीय गर्भवती महिलेची निर्घृण हत्या करण्यात आली. धक्कदायक म्हणजे ५ लाख रुपयांचा हुंडा देण्यास महिलेने नकार दिल्याने तिच्या पतीने आणि सासरच्यांनी मिळून तिची हत्या केली आहे. याप्रकरणी पोलिसांनी तपासकार्य हाती घेतले आहे.

मिळालेल्या माहितीनुसार, गोपाळपूर गावातील रजनी कुमारी हिचा विवाह एप्रिलमध्ये सचिन नावाच्या तरुणाशी झाला होता. लग्नाच्या काही महिन्यांतच रजनीवर तिच्या सासरच्या लोकांकडून वाढता दबाव येऊ लागला. तिचा पती सचिन, त्याचे भाऊ प्रांशु आणि नातेवाईक रामनाथ, दिव्या आणि टीना यांनी तिच्याकडे ५ लाख रुपयांचा हुंडा मागितला. जेव्हा रजनीने नकार दिला तेव्हा तिला सतत मारहाण आणि मानसिक छळ सहन करावा लागला.

शुक्रवारी रात्री हा वाद इतका वाढला की रजनीच्या सासरच्यांनी तिच्यावर जीवघेणा हल्ला केला. पोलिस तपासात मिळालेल्या माहितीनुसार हत्येनंतर आरोपीने पुरावे नष्ट करण्यासाठी तिला शेतात जाळले. तथापि, रजनीची आई सुनीता देवी यांना हे कळताच त्यांनी ताबडतोब ओंचा पोलिस ठाण्यात तक्रार दाखल केली.

अतिरिक्त पोलिस अधीक्षक (ग्रामीण) राहुल मिथास म्हणाले की, सचिन, प्राणशु, सहबाग, रामनाथ, दिव्या आणि टीना या सहाही आरोपींविरुद्ध एफआयआर दाखल करण्यात आला आहे. आरोपींना अटक करण्यासाठी पोलिस पथके जागोजागी छापे टाकत आहेत. लवकरच हे सगळे तुरुंगात असतील अशी ग्वाही पोलीस अधिकाऱ्यांनी दिली आहे.

या प्रकरणामुळे पुन्हा एकदा समाजातील हुंडा बळीला कायमचा ब्रेक लागेल का? असा प्रश्न उपस्थित होतो. एका गर्भवती महिलेला तिच्या पालकांच्या घरून पैसे न आणल्यामुळे तिचा जीव गमवावा लागला. ही घटना थरकाप उडवणारी आहे. हुंडा व्यवस्था अजूनही किती घातक आहे याचे हे एक वेदनादायक उदाहरण रजनीच्या हत्येतून समोर आले आहे.