Man Cuts His Private Part : मध्य प्रदेशातील छतरपूर जिल्ह्यातून एक अत्यंत धक्कादायक घटना समोर आली आहे. साधू बनण्याची इच्छा आणि सांसारिक मोह-माया सोडण्याच्या उद्देशाने एका 42 वर्षीय व्यक्तीने स्वतःचाच खासगी अवयव कुऱ्हाडीने कापल्याची घटना घडली आहे. या घटनेमुळे परिसरात खळबळ उडाली असून संबंधित व्यक्तीवर रुग्णालयात उपचार सुरू आहेत.

मिळालेल्या माहितीनुसार, राममिलन यादव असे या व्यक्तीचे नाव आहे. तो मध्य प्रदेशातील छतरपूर जिल्ह्यातील महाराजपूर पोलीस ठाण्याच्या हद्दीत राहतो. शनिवारी सकाळी 9 च्या दरम्यान आपल्या शेताजवळील विहिरीजवळ त्याने हे टोकाचे पाऊल उचलले. गंभीर जखमी झाल्यामुळे मोठ्या प्रमाणात रक्तस्त्राव झाला त्यामुळे घाबरुन त्याने आपल्या चुलत भावाला फोन करून घटनेची माहिती दिली. त्यानंतर कुटुंबीयांनी त्याला तातडीने जवळच्या आरोग्य केंद्रात दाखल केले. प्रकृती गंभीर असल्याने पुढे जिल्हा रुग्णालयात हलविण्यात आले.

स्वत: सांगितला घडलेला संपूर्ण प्रकार

सोशल मीडियावर या घटनेशी संबंधित एक व्हिडीओही व्हायरल होत आहे. त्यामध्ये संबंधित व्यक्ती स्वतः सांगताना दिसत आहे की, त्याला अनेक दिवसांपासून वासना आणि रागाच्या भावनांचा त्रास होत होता. त्यामुळे या भावना कायमच्या संपवण्यासाठी त्याने स्वतःसोबत ही भयानक कृती केली. पुढील आयुष्य प्रार्थना, समाजसेवा आणि अध्यात्मासाठी समर्पित करण्याची त्याची इच्छा असल्याचेही त्याने सांगितले आहे.

मुलीचे जूनमध्ये लग्न

कुटुंबीयांनी दिलेल्या माहितीनुसार, राम मिलनची पत्नी बऱ्याच काळापासून पक्षाघाताने (पॅरालिसीसने) ग्रस्त असून ती अंथरुणाला खिळलेली आहे. राम मिलनकडेही कोणताही स्थिर रोजगार किंवा उत्पन्नाचे साधन नव्हते. त्याला चार मुले आहेत. त्यांची डळमळीत आर्थिक परिस्थिती आणि राम मिलनच्या बेजबाबदार वर्तनामुळे, त्याच्या नातेवाईकांनी या मुलांना आपल्या आश्रयाखाली घेतले आहे. त्याच्या मेहुण्याने (पत्नीच्या भावाने) धाकट्या मुलीला दत्तक घेतले आहे, तर त्याच्या पत्नीच्या बहिणीच्या पतीने मौठ्या मुलीला दत्तक घेतले आहे. मौठ्या मुलीचे लग्न २० जून रोजी असून, त्याची तयारीही आधीपासूनच सुरू होती. अशा परिस्थितीत, त्याने उचललेल्या या अत्यंत टोकाच्या पावलामुळे संपूर्ण कुटुंब हादरून गेले आहे.

राम मिलनला गांजाचे व्यसन

राम मिलनचा भाऊ, नारायण सिंग याने सांगितले की, राम मिलनला बऱ्याच काळापासून गांजाचे व्यसन करत होता. या अंमली पदार्थाच्या अतिसेवनामुळे त्याचे मानसिक संतुलन पूर्णपणे बिघडले होते आणि याच भ्रमाच्या अवस्थेत त्याने हे अत्यंत टोकाचे पाऊल उचलले. त्याने पुढे सांगितले की, हे कृत्य केल्यानंतर राम मिलन त्याच्याकडे आला आणि त्याने आपला प्रायव्हेट पार्ट कापून विहिरीत फेकून दिल्याची कबुली दिली.

डॉक्टरांनी वाचवला जीव

जिल्हा रुग्णालयातील सर्जन डॉ. मनोज चौधरी यांनी सांगितले की, रुग्णाला रुग्णालयात आणेपर्यंत त्याचा खूप मोठ्या प्रमाणात रक्तस्राव झाला होता. एका धारदार कुऱ्हाडीच्या घावामुळे त्याचे जननेंद्रिय जवळजवळ पूर्णपणे कापले गेले होते. केवळ एक छोटासा भागच शरीराशी जोडलेला उरला होता. रक्तस्राव थांबवण्यासाठी डॉक्टरांनी तातडीने शस्त्रक्रिया केली. मोठ्या प्रमाणात रक्तस्राव झाल्यामुळे रुग्णाची प्रकृती अद्यापही अत्यंत नाजूक आणि गंभीर आहे.