चारित्र्याच्या संशयावरुन एका नवऱ्याने त्याच्या बायकोची निर्घृण हत्या केली. हत्या झाल्याचे लपवण्यासाठी त्याने बायकोचा मृतदेह घराजवळील शेणाच्या ढिगाऱ्यात पुरला. कोणाला संशय येऊ नये यासाठी आरोपी नवऱ्याने स्वत:च्या वडिलांना पोलीस स्थानकामध्ये पाठवून बायको बेपत्ता असल्याची तक्रार करायला लावली. पण पोलिसांच्या हुशारीमुळे हे प्रकरण उघडकीस आले आहे. ही घटना उत्तरप्रदेशातील कन्नोज जिल्ह्यात घडली आहे.

मिळालेल्या माहितीनुसार, मृत बायकोचे नाव बबली, तर तिच्या आरोपी नवऱ्याचे नाव रजनीकांत असे आहे. सात वर्षांपर्वी त्यांचे लग्न झाले होते. लग्नानंतर त्यांना एक मुलगा आणि दोन मुली झाल्या. पण कालांतराने रजनीकांतला त्याच्या बायकोवर संशय येऊ लागला. बबली दुसऱ्या माणसाशी बोलत असल्याचे रजनीकांतला वाटत होते. या संशयापायी त्याने बबलीची हत्या केली.

घटनेच्या रात्री रजनीकांत आणि बबली यांच्यामध्ये वाद झाला. रागाच्या भरात रजनीकांतने त्याच्या बायकोवर चाकूने हल्ला केला. त्यानंतर त्याने बबलीचा गळा चिरुन तिची हत्या केली. या घटनेच्या वेळेस रजनीकांतचे आईवडील काही कारणांमुळे बाहेर गेले होते, तर त्यांची मुलं घरात झोपली होती. कुणाला काही कळू नये यासीाठी रजनीकांतने बबलीचा मृतदेह शेणाच्या ढिगाऱ्यात लपवून ठेवला.

आईवडील परतल्यानंतर रजनीकांतने बबली बेपत्ता असल्याचे सांगितले. त्यांनी पोलीस स्थानकात जाऊन तक्रार दाखल केली. त्यानंतर पोलिसांनी तपास करण्यास सुरुवात केली. रजनीकांतच्या बोलण्यात पोलिसांना चुका आढळल्या होत्या. पोलिसांनी त्याला ताब्यात घेत कडक चौकशी केली. तेव्हा रजनीकांतने गुन्हा कबूल केला. त्यानंतर पोलिसांनी मृतदेह ताब्यात घेत शवविच्छेदनासाठी पाठवला. बायकोची हत्या करणे आणि तिचा मृतदेह लपवून ठेवणे यामुळे रजनीकांतला पोलिसांनी अटक केली आहे.