बीड जिल्ह्यातील केज तालुक्यात अत्यंत धक्कादायक घटना उघडकीस आली आहे. तालुक्यातील गटशिक्षणाधिकारी लक्ष्मण बेडसकर याने १६ वर्षीय मुलीवर नाश्ता देण्याच्या बहाण्याने अतिप्रसंग केला आहे. बेडसरकर याच्याविरुद्ध अल्पवयीन मुलीवर विनयभंग केल्याप्रकरणी गुन्हा दाखल करण्यात आला आहे. या घटनेने गाव हादरलं आहे.

मिळालेल्या माहितीनुसार, पीडित १६ वर्षीय मुलगी तिच्या मावशी व बहिणीसोबत होती. आरोपी बेडसकर याने त्यांना नाश्ता देण्याच्या बहाण्याने आपल्या चारचाकी गाडीत बसवले. मात्र, तो त्यांना एका निर्जनस्थळी घेऊन गेला. त्यानंतर त्याने अल्पवयीन मुलीवर अतिप्रसंग करण्याचा प्रयत्न केला. याचवेळी तिथे काही लोक दाखल झाल्यानंतर बेडसकर याने तेथून पळ काढला.

या घटनेनंतर पीडित मुलगी व तिच्या कुटुंबाने पोलिसात धाव घेतली. त्यानुसार केज पोलिसांनी बेडसकर याच्याविरुद्ध विनयभंगासह गंभीर गुन्हे दाखल केले आहेत. यामुळे संपूर्ण तालुक्यात खळबळ उडाली आहे. मुलींसाठी सुरक्षिततेची जबाबदारी असलेल्या एका शैक्षणिक अधिकाऱ्याने असे वर्तन केल्याने संतापाची लाट पसरली आहे.

दरम्यान, आरोपी बेडसकर याच्या संदर्भात आणखी धक्कादायक माहिती समोर येत आहे. काही महिलांसोबत त्याने अश्लील संभाषण केल्याचे ऑडिओ रेकॉर्डिंग समाजमाध्यमांवर व्हायरल झाले आहे. तसेच त्याचे विवाहबाह्य संबंध असल्याचे देखील उघड झाले आहे. यामुळे त्याच्यावरील संशय अधिकच गडद झाला आहे. सध्या या प्रकरणाची चौकशी केज पोलीस करत आहेत.