संजय जाधव, साम टीव्ही

बुलढाणा जिल्ह्यातील मेहकर येथून हादरवून टाकणारी दुहेरी हत्या समोर आली आहे. एका निर्दयी पतीने त्याच्या पत्नीवर चारित्राच्या संशयावरून तिची हत्या केली आहे आणि हा नराधम इथेच न थांबता त्याने आपल्या मुलाचा देखील जीव घेतला आहे. स्वतःच्या घरातच त्याने पत्नी आणि चार वर्षीय मुलावर कुऱ्हाडीने वार करत त्यांची हत्या केली आहे.

शिक्षक कॉलनीतील राहणारा राहुल हरीभाऊ म्हस्के (वय 33) या व्यक्तीने पत्नी रूपाली म्हस्के आणि चार वर्षीय मुलगा रेहांश म्हस्के यांची घरातच कुऱ्हाडीने वार करत हत्या केल्याची माहिती पोलिसांनी दिली आहे.

घटनेची माहिती भास्कर शंकर वानखेडे (वय 55, मोळा, तालुका मेहकर) यांनी मेहकर पोलीस ठाण्यात तक्रार दाखल करून दिली. पोलिसांनी आरोपीला ताब्यात घेतले असून, सध्या त्याच्याकडून चौकशी सुरू आहे. सदर हत्याकांड कौटुंबिक वादातून उभा राहिल्याचे आणि पतीने पत्नीच्या चारित्र्यावर संशय घेऊन ही हल्ला केल्याचे प्राथमिक तपासात समोर आले आहे.

या भयंकर हल्ल्यात मुलगी आणि नातू गंभीर जखमी झाले असले तरी उपचारापूर्वीच त्यांचा मृत्यू झाला. पोलीस निरीक्षकांच्या मार्गदर्शनाखाली पुढील तपास सुरू असून संपूर्ण परिसरात ही घटना खळबळ उडवून दिली आहे. या प्रकरणामुळे संशयातून होणाऱ्या कौटुंबिक हिंसाचाराचे भयावह वास्तव पुन्हा एकदा समोर आले आहे.