पुण्याहून वेगवेगळ्या ठिकाणी निघालेली 11 विमाने बॉम्बने उडून देण्याची धमकी देण्यात आली आहे. ट्विटरवरुन एका नामांकित एअर कंपनीच्या मॅनेजरला ट्विट करत विमाने उडून देऊ, अशी धमकी देण्यात आलीये. या धमकीमुळे पुणे एअरपोर्टवरील प्रवाशांमध्ये एकच घबराट पसरली आहे.

विमान क्षेत्रात नामांकित असलेल्या या कंपनी मॅनेजरला एक मेल आणि ट्विट आलं आहे. ट्विटमध्ये आरोपीने पुण्यावरून परदेशासह देशभरात वेगवेगळ्या ठिकाणी निघालेल्या विमानात बॉम्ब असून बॉम्ब थोड्याच वेळात ब्लास्ट होणार आहेत अशी धमकी देऊन एअरपोर्टवर भीती निर्माण केली आहे.

ही विमाने दिल्ली ते पुणे आणि पुणे ते कलकत्ता यासह वेगवेगळ्या देशात निघाली होती. या प्रकरणी अज्ञात व्यक्ती विरोधात विमानतळ पोलिसांत गुन्हा दाखल करण्यात आला आहे. पोलिसांनी या प्रकरणी तपास सुरू केली असून आरोपींचा शोध धेण्याचे काम सुरू आहे.

विमानात बॉम्ब असल्याची धमकी या आधी देखील एका विमानाला देण्यात आली होती. गेल्याच आठवड्यात १७ ऑक्टोबर रोजी फ्रँकफ्रूटवरून मुंबईच्या दिशेने येणाऱ्या विस्तारा विमानात बॉम्ब असल्याची धमकी देण्यात आली होती. ही धमकी देखील सोशल मीडियावरून देण्यात आली होती.

मुंबई विमानतळावर या विमानाचे लँडिंग झाल्यानंतर विमानाची तपासणी करण्यात आली. मात्र त्यावेळी विमानात काहीही संशयास्पद आढळून आले नाही.