बिहारमधील मुंगेर जिल्ह्यातील पूर्वसराय पोलीस ठाण्याच्या हद्दीतील शाहजुवीर रोड परिसरात पती-पत्नीतील कौटुंबिक वादातून एक धक्कादायक घटना समोर आली आहे. संतापात पत्नीने पतीच्या गुप्तांगावर धारदार शस्त्राने हल्ला केला. या हल्ल्यात पती गंभीर झाला. या घटनेनंतर महिला आपल्या चार महिन्यांच्या मुलीसह घरातील दागिने घेऊन फरार झाली.

या घटनेमुळे परिसरात मोठी खळबळ उडाली आहे. जखमी झालेल्या मोहम्मद फैसल खान यांना त्यांच्या कुटुंबीयांनी तातडीने मुंगेर सदर रुग्णालयात दाखल केले आहे. डॉक्टरांनी त्यांच्या गुप्तांगावर चार टाके घातले असून सध्या त्यांची प्रकृती स्थिर असल्याचे सांगितले आहे.

मिळालेल्या माहितीनुसार, फैसल यांचा विवाह १३ एप्रिल २०२५ रोजी भागलपूर जिल्ह्यातील कबीरपूर येथील इशरत हसन उर्फ सानिया हिच्याशी झाला होता. लग्नानंतर सुरुवातीचे काही महिने सर्व काही सुरुळीत सुरू होतं. मात्र, काही काळानंतर दोघांमध्ये वाद होऊ लागला. फैसल यांनी आरोप केला की, त्यांच्या पत्नीचे दुसऱ्या व्यक्तीसोबत अनैतिक संबंध होते आणि ती त्या व्यक्तीशी सतत फोनवर संपर्कात असायची.

याच कारणावरून पती-पत्नीमध्ये अनेकदा वाद होत होते. तसेच पत्नीने स्वतंत्र राहण्याची मागणीही केली होती. घटनेच्या आदल्या दिवशीही सानिया आणि फैसल यांच्या आईमध्ये वाद झाल्याचे सांगितले जात आहे. घटनेच्या रात्री फैसल कामावरून घरी परतल्यानंतर दोघांमध्ये पुन्हा वाद झाला. याचदरम्यान संतापाच्या भरात पत्नीने धारदार शस्त्राने त्यांच्या गुप्तांगावर हल्ला केल्याचा आरोप आहे. गंभीर जखमी झालेला फैसल रक्ताच्या थारोळ्यात पडला होता. त्यानंतर आरोपी पत्नी घरातून निघून गेली.

दरम्यान, पूर्वसराय पोलीस ठाण्याचे अधिकारी सौरभ कुमार यांनी सांगितले की, हा पती-पत्नीमधील कौटुंबिक वादाचा प्रकार आहे. प्राथमिक तपासात पतीकडून पत्नीला मारहाण होत असल्याची माहिती समोर आली आहे. पोलिसांनी दोन्ही बाजूंचे म्हणणे नोंदवून घेतले असून प्रकरणाचा पुढील तपास सुरू आहे. फैसल यांनी आपल्या मुलीला परत मिळवून देण्याची आणि पत्नीविरोधात कठोर कारवाई करण्याची मागणी केली आहे.