Uttar Pradesh Aligarh Police Constable Sexual Favour Allegation उत्तर प्रदेशातील अलीगडमध्ये एका बलात्कार पीडितेची मदत करण्याऐवजी, पोलीस कॉन्स्टेबलने तिच्याकडे शरीरसुखाची मागणी केल्याचा धक्कादायक प्रकार उघडकीस आला आहे. "जर तुला न्याय हवा असेल आणि आरोपीवर कारवाई करायची असेल, तर तुला माझ्यासोबत झोपावे लागेल," असं संतापजनक वक्तव्य या पोलिसाने केल्याचा आरोप पीडितेने केला आहे.

मिळालेल्या माहितीनुसार, पीडित महिला एका बलात्कार प्रकरणाची तक्रार घेऊन पोलीस ठाण्यात सतत ये जा करत होती. या प्रकरणाचा तपास किंवा कागदपत्रांची पूर्तता करण्याच्या बहाण्याने संबंधित कॉन्स्टेबलने तिला बोलवले.

पोलिसाने तिला एकांतात बोलावून अश्लील मागणी केली. न्याय मिळवून देण्याच्या बदल्यात त्याने तिच्याकडे शारीरिक संबंध ठेवण्याची इच्छा व्यक्त केली. तसेच आपण दोघे एकाच समाजाचे आहोत. तुला आरोपीवर कारवाई व्हावी असे वाटत असेल तर माझ्यासोबत झोप, असे त्याने तिला म्हटले.

पोलीस कर्मचाऱ्याच्या या वागणुकीमुळे पीडितेने वरिष्ठ पोलीस अधिकाऱ्यांकडे याबाबत तक्रार केली. तिने या संपूर्ण प्रकरणाची कैफियत मांडली असून आरोपी पोलिसाविरुद्ध कठोर कारवाईची मागणी केली आहे. या घटनेचे गांभीर्य ओळखून अलीगड पोलिसांनी चौकशीचे आदेश दिले असून, दोषी आढळल्यास त्या कॉन्स्टेबलवर कडक कारवाई करण्याचे आश्वासन दिले आहे.