मोहोळ तालुक्यातील अनगर येथे एका दुमजली जुगार अड्ड्यावर पोलिसांच्या विशेष पथकाने धाड टाकून 38 जणांना पकडले. या कारवाईत रोख रकमेसह महागड्या मोटारी आणि किंमती स्मार्टफोन असा मिळून 1 कोटी 3 लाख 6900 रूपये किंमतीचा मुद्देमाल जप्त केला आहे. या कारवाईत सुरत शहरासह रत्नागिरी, बीड येथील अनेक बडे व्यापारी आणि उद्योजक जुगार खेळताना सापडल्याने एकच खळबळ उडाली आहे.

एका इमारतीत तिरट नावाचा जुगार सुरू असल्याची माहिती परिविक्षाधीन सहायक पोलीस अधीक्षक शुभमकुमार यांना मिळाली होती. त्यानुसार खात्री करून त्यांनी तेथे पोलिसांच्या विशेष पथकाला सोबत नेऊन धाड टाकली. तेव्हा इमारतीच्या दोन्ही मजल्यांमध्ये जुगार खेळला जात असल्याचे दिसून आले.

या धाडीत एकूण 39 जणांना अटक करण्यात आली आहे. यामध्ये रियाज बाशू मुजावर, दीपक गायकवाड (रा. मोहोळ), विनायक नीलकंठ ताकभाते, मनोज नेताजी सलगर, स्वप्नील कोटा, रोनक नवनीत मर्दा, हर्षल राजेंद्र सारडा, कृष्णा अर्जुन काळे (रा. सोलापूर), ओंकार विजय चव्हाण, अबरार करीम फकीर (रा. चिंचनाका, चिपळूण, जि. रत्नागिरी), फारूख याकूब शेख (रा. सुरत, गुजरात), एकनाथ भगवान चांगिरे (रा. परळी वैजनाथ, जि. बीड), विलास धर्मराज कडेकर (रा. बडवणी, बीड), नितीन गुंड (रा. अनगर) यांचा समावेश आहे.

या कारवाईत 2 लाख 26 हजार रूपये रोकडसह सहा महागड्या कार आणि 40 माेबाईल फोन असा एकूण 1 कोटी 3 लाख 6900 रूपये किंमतीचा मुद्देमाल जप्त करण्यात आला आहे.

Edited By : Siddharth Latkar