राजस्थानमधून धक्कदायक बातमी समोर आली आहे. 'माय मरो आणि मावशी जगो' अशी बोली भाषेतील एक म्हण प्रचलित आहे. मात्र याच मावशीने चक्क १६ दिवसांच्या चिमुकल्या बाळाची निर्घृण हत्या करण्यात आली आहे. धक्कदायक म्हणजे या बाळाच्या चार मावशांनी मिळून हे कृत्य केल्याचं उघड झालं आहे. लग्न होत नसल्याने अंधश्रद्धेला बळी पडून ही घटना घडली. या दुर्घटनेत चिमुकल्या बाळाचा मृत्यू झाला आहे. याप्रकरणी पोलीस तपास करत आहेत.

मिळालेल्या माहितीनुसार, सदर घटना राजस्थानातील जोधपूरमध्ये पंचबत्ती नेहरू कॉलनीत शुक्रवारी रात्री घडली आहे. या घरात राहणाऱ्या ४ महिलांनी मिळून त्यांच्याच बहिणीच्या १६ दिवसांच्या बाळाला अमानुष मारहाण केली. या बाळाला जमिनीवर आपटून मारल्याने त्याचा जागीच मृत्यू झाला. या चारही महिला बाळाच्या मावशी असून या चौघींच लग्न होत नसल्याने अंधश्रद्धेला बळी पडून टोकाचं पाऊल उचलले असल्याचं समोर आलं आहे.

या घटनेनंतर बाळ कुठेच दिसत नसल्याने कुटुंबीयांनी शोध घेतला मात्र तो कुठेच दिसला नाही. सगळं घर शोधल्यावर कुटुंबीयांना एका ठिकाणी बाळ जमिनीवर निपचित पडलेलं आढळलं. यानंतर कुटुंबीयांनी त्याला रुग्णालयात नेलं, मात्र रुग्णालयात नेण्यापूर्वी त्याचा मृत्यू झाला. या घटनेबाबत मृत बाळाच्या वडिलांनी पोलीस ठाण्यात तक्रार नोंदवली असता पोलिसांनी या घटनेचा तपास सुरु केला.

पोलिसांनी याप्रकरणी चौकशी केली असता बाळाच्या ४ मावशींनी मिळून हे अमानुष कृत्य केल्याचं उघडकीस आलं. मृत मुलाच्या वडिलांनी सांगितलं की त्यांच्या पत्नीच्या ४ बहिणींचं लग्न होत नव्हतं त्यामुळे त्यांनी अंधश्रद्धेचा मार्ग निवडला. या अंधश्रद्धेतून बळी देण्यासाठी या चौघींनी मिळून बाळाचा जीव घेतला. या प्रकरणाचा व्हिडिओ सोशल मीडियावर व्हायरल होत असून पोलिसांनी या चौघींना ताब्यात घेतलं आहे.