इराण- इस्त्रायल युद्धाचा फटका भारतीय शेअर मार्केटवर होत आहे. आठवड्याच्या सलग दुसऱ्या दिवशी शेअर मार्केटमध्ये घसरण कायम आहे. मागील काही दिवसांपासून बीएसई (BSE)-एनएसईमध्ये (NSE) घसरण सुरुच आहे. आज सकाळी सेन्सेक्समध्ये 507 अंकानी घसरण झाली आहे. सेनसेक्स 72892 च्या पातळीवर उघडला आहे.

सेन्सेक्समधील जवळपास २८ स्टॉक्स घसरणीसह उघडले आहेत. बजाज फिनसर्व्ह, मारुती, कोटक बँक (Kotak Bank), विप्रो (Wipro), एचसीएल टेक, इन्फोसिस, इंडसइंड बँक, टेक महिंद्रा, टायटन, सन फार्मा या कंपन्यांच्या शेअर्समध्ये घसरण झाली आहे. फक्त टाटा स्टील आणि एनटीपीसी कंपन्याचे शेअर्स चांगल्या अंकावर व्यापार करत आहेत.

इराण- इस्त्रायलच्या तणावाचा परिणाम सेनसेक्स (Sensex) आणि निफ्टीवर (NIFTY) होताना दिसत आहे. शेअर बाजारातील सेन्सेक्स आणि निफ्टी 50 मध्ये घसरण होण्याची शक्यता आहे. आज गिफ्ट निफ्टी जवळपास 22,185 अंकावर व्यव्हार करत आहे. हे निफ्टी फ्युचर्सच्या तुलनेत 180 अंकानी घसले आहेत.

इराण- इस्त्रायल युद्धाचा परिणाम आशियाई बाजारावरदेखील झालेला दिसत आहे. जपानचा नेक्केई (nikkei) 225 1.5 टक्क्यांनी घसरला आहे तर टॉपिक्स (Topix) 1.04 टक्क्यांनी घसरला आहे. दक्षिण कोरियाचा कोस्पी 1.31 टक्के तर कोस्डॅत 0.86 अंकानी घसरला आहे.