आजकाल प्रत्येकजण पगारातून काही रक्कम वाचवून कुठेतरी गुंतवणूक करण्याचा प्रयत्न करत असतो. पैसे सुरक्षित राहतील आणि चांगले रिटर्न्स मिळतील अशा ठिकाणी गुंतवणूक करण्याकडे प्रत्येकाचा कल असतो. अशांसाठी पोस्ट ऑफिसद्वारे चालवली जाणारी टाइम डिपॉझिट योजना फायदेशीर ठरु शकते. या योजनेत गुंतवणूक केल्यास फक्त व्याजातून २ लाख रुपयांपर्यंतची कमाई करता येईल.

लहानांपासून ते थोरांपर्यंत, प्रत्येक वयोगटासाठी पोस्ट ऑफिसमध्ये बचत योजना चालवल्या जात आहेत. जबरदस्त रिटर्न्स, सुरक्षित गुंतवणूक आणि कर सवलतींचा लाभ यामुळे टाइम डिपॉझिट योजना गुंतवणूकदारांमध्ये लोकप्रिय आहे. या योजनेत पाच वर्षांसाठी पैसे गुंतवावे लागतात. सरकार या योजनेत गुंतवणूकदारांना ७.५ टक्के व्याजदर देत आहे. थोडक्यात रिटर्न्स देण्याच्या बाबतीत ही योजना Saving Scheme पेक्षा पुढे आहे.

पोस्ट ऑफिसच्या टाइम डिपॉझिट योजनेच्या अंतर्गत, गुंतवणूकदार वेगवेगळ्या कालावधीसाठी गुंतवणूक करु शकतात. यात १, २, ३ आणि ५ वर्षांसाठी पैसे गुंतवता येतात. एका वर्षासाठी गुंतवणूक केल्यास ६.९ टक्के व्याज मिळते. तर २ किंवा ३ वर्षांसाठी पैसे गुंतवल्यास ७ टक्के व्याजदराने पैसे मिळतात. ५ वर्षांसाठीच्या गुंतवणूकीत ७.५ टक्के दराने व्याज मिळते.

गुंतवणूकदार केवळ व्याजातून २ लाख रुपयांपर्यंतची कमाई करु शकतात. पाच वर्षांसाठी ५ लाख रुपये गुंतवले, तर ७.५ टक्के व्याजदराने गुंतवणूकदाराला ५ वर्षांच्या कालावधीत २,२४,९७४ रुपये रिटर्न मिळेल. व्याज आणि गुंतवणूकीची रक्कम अशी एकूण ७,२४,९७४ रुपये मिळतील. याचा अर्थ व्याजातून २ लाखांपेक्षा जास्त उत्पन्न मिळेल.

टाइम डिपॉझिट योजनेमध्ये ग्राहकांना आयकर कायदा १९६१ च्या कलम ८० सी अंतर्गत कर सवलतीचा लाभ देखील दिला जातो. या योजनेत एक किंवा संयुक्त खाते उघडता येते. १० वर्षांपेक्षा जास्त वयाच्या मुलाचे खाते त्याच्या किंवा तिच्या कुटुंबातील सदस्याद्वारे उघडता येते. किमान एक हजार रुपयांपासून खाते उघडता येते. यात दरवर्षी व्याजाचे पैसे जोडले जातात. कमाल गुंतवणूकीवर कोणतीही मर्यादा नाही. हवे तितके पैसे टाइम डिपॉझिट योजनेत गुंतवता येतात.