पेन्शन फंड रेग्युलेटरी अँड डेव्लपमेंट ऑथोरिटी म्हणजे PFRDAने महत्त्वाचा निर्णय घेतला आहे. नॅशनल पेन्शन सिस्टीमच्या नियमात मोठा बदल केला आहे. यामुळे कर्मचारी आणि पेन्शनधारकांना फायदा होणार आहे. आता प्रायव्हेट क्षेत्रात काम करणाऱ्या कर्मचाऱ्यांना निवृत्तीवेळी निवृत्ती निधीपैकी ८० टक्के रक्कम एकरकमी काढता येणार आहे. तर २० टक्के रक्कम अॅन्युटी खरेदी करण्यासाठी शिल्लक ठेवली जाते. याआधी तुम्हाला ६० टक्के रक्कम एकरकमी काढता येत होती. तर ४० टक्के रक्कम अॅन्युटीसाठी ठेवणे अनिवार्य आहे.

पीएफआरडीएने जारी केलेले हे नियम डिसेंबर २०२५ पासून लागू होणार आहे. म्हणजेच खासगी क्षेत्रातील कर्मचारी निवृत्त होत असेल आणि त्याने एनपीएसचा लाभ घेतला असेल तर तो ८० टक्के रक्कम एकरकमी काढू शकतो. त्याला २० टक्के रक्कम अॅन्युटीसाठी शिल्लक ठेवावी लागेल. ही अॅन्युटी खरेदी केल्यानंतर कर्मचाऱ्यांना पेन्शन मिळणार आहे.

हे नियम ऑल सिटीजन मॉडेल आणि कॉर्पोरेट एनपीएसअंतर्गत येणाऱ्या कर्मचाऱ्यांना लागू होतात. यामुळे कर्मचाऱ्यांना खूप दिलासा मिळणार आहे. कर्मचाऱ्यांना निवृत्तीनंतर दर महिन्याला पेन्शन मिळवण्यासाठी अॅन्युटी खरेदी करावी लागते.

अॅन्युटीसाठी २० टक्के शेअर कमी केला

याआधी कर्मचाऱ्यांना ४० टक्के रक्कम अॅन्युटीमध्ये गुंतवावी लागायची. या आधारावर पेन्शन दिली जायची. मात्र, आता ही रक्कम २० टक्क्यांनी कमी केली आहे. याचाच अर्थ असा की, तुमची पेन्शन रक्कम कमी येईल. परंतु तुम्ही आता ८० टक्के रक्कम एकरकमी काढू शकतात. एनपीएसअंतर्गत १५ वर्षे पूर्ण केले आणि वयोमर्यादा ६० ओलांडली आणि निवृत्त झाले असेल तर त्यांनाच याचा लाभ घेता येणार आहे.

एनपीएसमधून पैसे काढण्याचे नियम (NPS Money Withdrawal Rule)

जर एखाद्या कर्मचाऱ्याची रक्कम ८ लाखांपेक्षा कमी असेल तर ते संपूर्ण रक्कम काढू शकतात. याचसोबत त्यांना अॅन्युटी खरेदी करण्याचाही ऑप्शन असतो.

जर ८ ते १२ लाख रक्कम असेल तर त्यातून ६ लाख रुपये एकरकमी काढू शकतात. उर्वरित रक्कम तुम्ही अॅन्युटीसाठी काढू शकतात.

जर एकूण रक्कम १२ लाखांपेक्षा जास्त असेल तर त्यातील २० टक्के रक्कम अॅन्युटी खरेदी करण्यासाठी वापरली जाईल आणि ८० टक्के रक्कम एकरकमी काढता येणार आहे.