लाडक्या बहि‍णींच्या खात्यात ऑगस्ट महिन्याचा हप्ता यायला सुरूवात झाली आहे. पण या योजनेसंदर्भात सध्या सोशल मीडियावर सध्या एक मेसेज मोठ्या प्रमाणात व्हायरल होत आहे. यामध्ये नवीन अर्ज प्रोसेस सुरू झाली असून, रखडलेले हप्ते मिळवण्यासाठी दिलेल्या लिंकवर क्लिक करून पुन्हा अर्ज करण्याचं आवाहन केलं जात आहे. मात्र, या दाव्याबाबत शासनाकडून महत्त्वाचा खुलासा करण्यात आला आहे.

व्हायरल मेसेजमध्ये ई-केवायसी अपूर्ण राहिलेल्या किंवा हप्ते बंद झालेल्या महिलांनी पुन्हा अर्ज करावा, असं सांगितलं जातं. अर्जासाठी आधार कार्ड, रेशन कार्ड, रहिवासी प्रमाणपत्र, बँक खात्याची माहिती आणि फोटो यांसारखी वैयक्तिक कागदपत्रे मागितली जात असल्याचा दावा आहे. मात्र, अशा अनधिकृत लिंकवर माहिती भरल्याने वैयक्तिक आणि बँकिंग माहितीचा गैरवापर होण्याचा धोका निर्माण होऊ शकतो.

नवीन नोंदणी आणि ई-केवायसीबाबत काय?

मुख्यमंत्री माझी लाडकी बहीण योजनेसाठी नवीन नोंदणी प्रोसेस सध्या बंद असल्याची माहिती समोर आली आहे. तसेच ई-केवायसी पुन्हा सुरू झाल्याचा सोशल मीडियावरील दावा अधिकृत नसल्याचं स्पष्ट करण्यात आले आहे. त्यामुळे लाभार्थींनी अनोळखी वेबसाइट किंवा लिंकवर क्लिक करून कोणतीही वैयक्तिक माहिती देऊ नये.

ऑगस्टच्या हप्त्यासाठी ३३९ कोटींचा निधी

दरम्यान, पात्र लाभार्थी महिलांना ऑगस्ट २०२६ चा आर्थिक लाभ देण्यासाठी सामाजिक न्याय विभागाच्या ३३९ कोटी १४ लाख रुपयांच्या निधीला मंजुरी देण्यात आली आहे. २०२६ - २७ या आर्थिक वर्षात अनुसूचित जाती घटकासाठी योजनेकरिता ३ हजार कोटी रुपयांची तरतूद करण्यात आली आहे. त्यातून ऑगस्ट महिन्याच्या लाभासाठी ३३९ कोटी १४ लाख रुपये उपलब्ध करून देण्यात आले आहेत.

हा निधी सामाजिक न्याय आणि विशेष सहाय्य विभागाकडून महिला व बालविकास विभागाकडे वर्ग करण्यात आला आहे. निधीचे वितरण करताना लाभार्थींची छाननी करून फक्त पात्र महिलांनाच योजनेचा लाभ मिळेल, याची दक्षता घेण्याचे निर्देश देण्यात आले आहेत.

व्हायरल लिंकपासून सावध राहा

लिंकवर क्लिक करा आणि रखडलेला हप्ता मिळवा अशा संदेशांवर थेट विश्वास ठेवू नये. नवीन नोंदणी, ई-केवायसी, हप्ता किंवा निधी वितरणासंदर्भातली माहिती फक्त महाराष्ट्र शासनाच्या अधिकृत यंत्रणांकडूनच तपासावी. लाभार्थी महिलांनी कोणत्याही अनधिकृत वेबसाइटवर आधार किंवा बँक खात्याची माहिती देऊ नये.