लाडक्या बहि‍णींसाठी महत्त्वाची अपडेट समोर आली आहे. जुलै महिन्याचा १५०० रुपयांचा हप्ता पात्र महिलांच्या बँक खात्यात जमा झाल्यानंतर आता महिला ऑगस्ट महिन्याच्या हप्त्याची वाट पाहतायेत.सप्टेंबर महिना सुरू होऊन पहिला आठवडा संपला तरी ऑगस्टचा हप्ता खात्यात जमा झालेला नाही. त्यामुळे हा हप्ता नेमका कधी मिळणार, याकडे लाखो महिलांचे लक्ष लागले आहे.

लाडक्या बहिणींच्या खात्यावर पैसे कधी येणार?

दरम्यान, येत्या गणेशोत्सवाच्या पार्श्वभूमीवर ऑगस्ट महिन्याचा हप्ता महिलांच्या खात्यात जमा होण्याची शक्यता व्यक्त केली जातेय. मिळालेल्या माहितीनुसार, १६ सप्टेंबरनंतर ऑगस्ट महिन्याचा १,५०० रुपयांचा सन्माननिधी टप्प्याटप्प्याने वितरित करण्याची प्रोसेस सुरू होऊ शकते. मात्र, याबद्दल राज्य सरकारकडून अजून अधिकृत घोषणा झालेली नाही. त्यामुळे ही तारीख सध्या संभाव्य मानली जात आहे.

किती पात्र महिलांना मिळणार लाभ?

येत्या १४ सप्टेंबरपासून गणेशोत्सवाला सुरुवात होईल. सणाच्या पार्श्वभूमीवर सरकारकडून लाडक्या बहि‍णींना आर्थिक मदत देण्याची तयारी केली जात असल्याची चर्चा आहे. योजनेतल्या पात्र महिलांना हा निधी थेट DBT (Direct Benefit Transfer) माध्यमातून त्यांच्या बँक खात्यात जमा केला जाणार आहे. या योजनेचा लाभ १ कोटी ६६ लाख पात्र महिलांना मिळत असल्याचं सांगितलं जात आहे. ऑगस्टच्या हप्त्यासाठी महत्त्वाच्या निधीला आगामी मंत्रिमंडळ बैठकीत मंजुरी मिळण्याची शक्यता असल्याचीही माहिती समोर आली आहे.

कोणत्या महिलांचा हप्ता रखडणार?

दरम्यान, लाभार्थी महिलांनी आपलं बँक खातं आधारशी लिंक आहे की नाही आणि DBT अॅक्टिव्ह आहे की नाही, याची खात्री करून घेणं महत्त्वाचं आहे. जेणेकरून हप्ता वितरित झाल्यानंतर रक्कम थेट खात्यात जमा होण्यास अडथळा येणार नाही.

मुख्यमंत्री माझी लाडकी बहीण योजना ही महाराष्ट्र सरकारची महत्त्वाची योजना असून, २१ ते ६५ वयोगटातील आणि कुटुंबाचे वार्षिक उत्पन्न २.५ लाखांपेक्षा कमी असलेल्या पात्र महिलांना दरमहा १,५०० रुपयांची आर्थिक मदत दिली जाते. आता ऑगस्टचा हप्ता १६ सप्टेंबरनंतर कधी आणि किती टप्प्यांत जमा होतो, याकडे लाभार्थी महिलांचे लक्ष लागले आहे.