लाडकी बहीण योजनेत महिलांच्या अर्जांची पडताळणी सुरु आहे. लाडकी बहीण योजनेत लाखो महिलांचे अर्ज बाद करण्यात आले आहे. अजूनही काही महिलांचे अर्ज बाद होण्याची शक्यता आहे. दरम्यान, लातूर जिल्ह्यातील हजारो महिलांचे अर्ज बाद करण्यात आले आहेत.

लाडकी बहीण योजनेत दोन टप्प्यांमध्ये महिलांच्या अर्जांची छाननी केली जात आहे. आता दुसऱ्या टप्प्यात अनेक महिलांचे अर्ज बाद करण्यात आले आहे. लातूरमधील ४ हजार ८३० महिलांचे अर्ज बाद करण्यात आले आहे. यामागे अनेक कारणे आहेत. काही महिलांनी वयोमर्यादेत बसत नसतानाही योजनेचा लाभ घेतला आहे तर एकाच कुटुंबातील तिघी-चौघींनी या योजनेचा लाभ घेतला आहे.

विधानसभेच्या तोंडावर शासनाने मुख्यमंत्री लाडकी बहीण योजना सुरु केली होती. महिलांना आत्मनिर्भर आणि स्वालंबी बनवण्यासाठी ही योजना आणल्याचं सांगितलं गेलं. मात्र सुरुवातीला या योजने त कुठलेही निकष न पाहता अनेक लाडक्या बहिणींना प्रति महिना दीड हजार रुपयाचा हप्ता देण्यास सुरुवात झाली. दरम्यान आता या योजनेतून मोठ्या संख्येने नियमात न बसणाऱ्या लाडक्या बहिणींचे नावे वगळायला सुरुवात केली आहे.

लातूरमधील महिला अपात्र

लातूर जिल्ह्यातदेखील दुसऱ्या टप्प्यात 4 हजार 830 लाडक्या बहिणींचे नाव कमी करण्यात आले आहेत. अंगणवाडी सेविकांकडून करण्यात आलेल्या सर्व्हे मध्ये, एकाच कुटुंबात तिघी चौघी महिलांनी लाभ घेतला, तर २१ पेक्षा कमी आणि 65 वर्षापेक्षा जास्त महिलांनी या योजनेचा लाभ घेतल्याचं निदर्शनास आले आहे. या महिलांना अपात्र करत योजनेचा लाभ थांबवण्यात आलाय.

निकषाबाहेर जाऊन योजनेचा लाभ

वयामुळे अपात्र झालेल्या लातूर जिल्ह्यात 1 हजार 16 लाडक्या बहिणींची नाव कमी करण्यात आलेत. तर एकाच कुटुंबातील तर दोन पेक्षा जास्त महिलांनी लाभ घेतलेल्या महिलांची संख्या 3 हजार 211 इतकी आहे . अशा अपात्र लाडक्या बहिणींची नाव कमी करण्यात आले आहेत. दरम्यान निकष डावलून लाभ घेणाऱ्या महिलांच्या कागदपत्रांची पडताळणी पुढे देखील सुरूच राहणार आहे.