ऐन सणासुदीत लाखो कर्मचाऱ्यांची चांदी होणार आहे. केंद्र सरकारने कृषी, बांधकाम, देखभाल तसेच रस्ते आणि इमारतींशी संबंधित कामांमध्ये कार्यरत कामगारांच्या महागाई भत्त्यात (DA) वाढ केली आहे. ही वाढ १ ऑक्टोबर २०२६ पासून लागू झाली आहे. महागाई भत्त्यातल्या वाढीमुळे वेगवेगळ्या श्रेणीतल्या कामगारांच्या बेसिक सॅलरीत वाढ झाली आहे.

कामगारांचं वेतन त्यांच्या कौशल्याच्या पातळीबरोबरच एरिया A, B आणि C या क्षेत्रांनुसार निश्चित करण्यात आलं आहे. त्यामुळे वेगवेगळ्या भागांमध्ये काम करणाऱ्या कामगारांना वेगवेगळी बेसिक सॅलरी मिळणार आहे.

कृषी क्षेत्रातल्या कामगारांना किती सॅलरी?

कृषी क्षेत्रात एरिया A मधल्या अकुशल कामगारांना आता दररोज ५३७ रुपये मिळतील. यामध्ये ३३३ रुपये मूळ सॅलरी आणि २०२४ रुपये महागाई भत्त्याचा समावेश असेल. याच क्षेत्रातल्या अतिशय कुशल कामगारांसाठी बेसिक सॅलरी ७०५ रुपये प्रतिदिन करण्यात आली आहे. एरिया B मध्ये अकुशल कामगारांना ४९१ रुपये, तर एरिया C मध्ये ४८६ रुपये प्रतिदिन बेसिक सॅलरी मिळेल.

बांधकाम क्षेत्रातल्या कामगारांनाही दिलासा

बांधकाम आणि देखभाल क्षेत्रातल्या कामगारांसाठीही नवीन दर लागू झाले आहेत. रस्ते, रनवे, इमारती, वीज व कम्युनिकेशनच्या भूमिगत केबल्स, पाणी पाइपलाइन आणि सीवर लाइन यांसारख्या कामांचा यामध्ये समावेश आहे.

एरिया A मधील अकुशल बांधकाम कामगारांची बेसिक सॅलरी ८४० रुपये प्रतिदिन, तर अतिशय कुशल कामगारांची सॅलरी १,१११ रुपये झाले आहे. एरिया B मध्ये हे प्रमाण अनुक्रमे ७०४ आणि १,२४ रुपये, तर एरिया C मध्ये ५६५ आणि ९३३ रुपये प्रतिदिन आहे.

महागाई भत्ता का वाढवला?

महागाई भत्ता हा वाढत्या जीवनावश्यक खर्चाचा परिणाम कमी करण्यासाठी वेतनात दिला जाणारा घटक आहे. सरकार औद्योगिक कामगारांच्या ग्राहक किंमत निर्देशांकावर (CPI-IW) आधारित त्याचे पुनरावलोकन करते. यावेळी निर्देशांक ४२४.८० वरून ४३१.४२ झाला असून, ६.६२ अंकांची वाढ झाल्याच्या आधारावर १ ऑक्टोबरपासून सुधारित महागाई भत्ता लागू करण्यात आला आहे.