Weekly Gold Silver Price Rate Update News मध्यपूर्वेतील वाढत्या तणावामुळे एकीकडे पेट्रोल, डिझेल आणि गॅसचे दर वधारले असताना, दुसरीकडे देशभरात सोन्या-चांदीच्या दरात गेल्या काही दिवसांपासून घसरण पाहायला मिळाली. यामुळे ग्राहकांना काहीसा दिलासा मिळाला आहे. विशेषतः लग्नसराईचा काळ आणि गुंतवणुकीसाठी सोने खरेदी करणाऱ्यांसाठी ही घसरण महत्त्वाची मानली जात आहे. गेल्या एका आठवड्यात सोन्याच्या दरात मोठी घसरण नोंदवली गेली असून, चांदीच्या किमतीतही घट झाली आहे. सोने चांदी खरेदी करणाऱ्यांसाठी हा आठवडा सुवर्णसंधी ठरली आहे.

२४ कॅरेट सोन्याच्या दरात एका आठवड्यात तब्बल ४,६९० रुपयांची घट झाली आहे. त्याचबरोबर २२ कॅरेट सोनेही ४,३०० रुपयांनी स्वस्त झाले आहे. ७ जून रोजी राजधानी दिल्लीमध्ये २४ कॅरेट सोन्याचा भाव प्रति १० ग्रॅम १,५५,९१० रुपये इतका नोंदवण्यात आला. तर २२ कॅरेट सोन्याचा भाव प्रति १० ग्रॅम १,४०,१५० रुपये आहे. यापूर्वी ५ जून रोजी दिल्लीच्या सराफा बाजारात सोन्याचा दर ४०० रुपयांनी घसरून १,५९,९०० रुपये प्रति १० ग्रॅमवर आला होता.

मुंबई आणि कोलकाता येथे २२ कॅरेट सोन्याचा भाव प्रति १० ग्रॅम १,४०,००० रुपये असून २४ कॅरेट सोन्याचा दर १,५२,७३० रुपये आहे. चेन्नईमध्ये २४ कॅरेट सोन्याचा दर १,५४,९१० रुपये तर २२ कॅरेट सोन्याचा दर १,४२,००० रुपये प्रति १० ग्रॅम इतका आहे. पुणे आणि बंगळुरूमध्येही मुंबईप्रमाणेच दर कायम आहेत.

सोन्याबरोबरच चांदीच्या दरातही मोठी घसरण झाली आहे. गेल्या आठवड्यात चांदीच्या दरात तब्बल १५ हजार रुपयांची घट झाली. ७ जून रोजी सकाळी चांदीचा भाव २,६५,००० रुपये प्रति किलोग्रॅम होता. तर शुक्रवारी दिल्लीच्या सराफा बाजारात चांदीचा दर ५,००० रुपयांनी घसरून २,६०,७०० रुपये प्रति किलोग्रॅमवर आला. पुढील काही दिवसांत बाजारातील परिस्थितीनुसार दरांमध्ये आणखी चढ-उतार होण्याची शक्यता तज्ज्ञांकडून व्यक्त करण्यात येत आहे.