गेल्या काही दिवसांपासून सोनं आणि चांदीच्या दरात सतत बदल होत आहे. धनत्रयोदशीला सोन्याच्या दरात कमालीची घट झाली होती. आजही सोन्याच्या दरात घसरण झाली आहे. पाडव्याच्या मुहूर्तावर सोन्याच्या दरात मोठी घसरण झाली आहे. गेल्या १२ तासांत सोन्याच्या भावात ६,२०० रूपयांनी घसरण झाली आहे. तर, चांदीच्या दरात ५ हजार रूपयांची घसरण झाली आहे.

जागतिक पातळीवर सोन्यातील आणि चांदीतील गुंतवणूक जास्त झाल्यानं प्रॉफिट बुकिंगचा परिणाम स्थानिक बाजारात दिसून आला आहे. यामुळे ग्राहकांमध्ये आनंदाचं वातावरण आहे. तसेच दिवाळी पाडव्यानिमित्त खरेदीसाठी गर्दीही वाढली आहे.

पाडव्यानिमित्त सुवर्णनगरीत अर्थात जळगावमध्ये सोन्यच्या दरात कमालीची घसरण झाली आहे. २४ कॅरेट १ तोळं सोन्याच्या दरात ६ हजार रूपयांची घसरण झाली आहे. सोन्याच्या दरात झालेल्या घसरणीमुळे ग्राहकांना दिलासा मिळाला आहे.

१ तोळं सोन्याची किंमत (जीएसटीसह) १ लाख २८ हजार ४०० इतकी आहे. तर, तोळं सोनं (जीएसटीशिवाय) १ लाख २४ हजार ८०० रूपये इतके आहे. चांदीच्या दरात देखील कमालीची घसरण झाली आहे. प्रति किलो चांदीचा दर (जीएसटीसह) १ लाख ६४ हजार ८०० रूपये इतके आहे. तर, (जीएसटीशिवाय) चांदीचा दर १ लाख ६० हजार इतका आहे.