संघटित क्षेत्रात काम करणाऱ्या कर्मचाऱ्याचे पीएफ अकाउंट असते. पीएफ अकाउंटमध्ये दर महिन्याला पैसे जमा केले जातात. दरम्यान, ईपीएफओ सदस्यांसाठी महत्त्वाची बातमी आहे. आता ईपीएफओ सदस्यांच्या पीएफ कॉन्ट्रिब्युशनची सॅलरी १५००० रुपयांवरुन २५००० रुपये करण्याची शक्यता आहे.त्यामुळे कोट्यवधी कर्मचाऱ्यांना फायदा होणार आहे.

केंद्र सरकारने शेवटचे २०१४ मध्ये पीएफ कॉन्ट्रिब्युशनच्या लिमिटमध्ये बदल केला होता. ही लिमिट ६,५०० रुपयांवरुन १५००० रुपये केली होती. त्यानंतर आता पुन्हा ही लिमिट वाढण्याची शक्यता वर्तवली जात आहे.

वाढत्या महागाईमुळे ईपीएस स्कीमअंतर्गत पेन्शनची मिळणारी रक्कम खूप कमी असल्याचे म्हटले आहे. यामध्ये बदल करण्याची मागणी होत आहे. सध्या ईपीएस ९५ अंतर्गत सेवानिवृत्त लोकांना कमीत कमी १००० रुपयांची पेन्शन मिळते. कामगार संघटना ईपीएसअंतर्गत ५००० रुपयांच्या पेन्शनची मागणी करत आहेत.

ईपीएफओअंतर्गत सॅलरी लिमिट १५,००० रुपये करण्यासाठी मागणी केली जात आहे. संसदेत झालेल्या हिवाळी अधिवेशनात याबाबत प्रश्न विचारण्यात आला होता. यासंदर्भात कामगार व रोजगार मंत्री मनसुख मांडवया यांनी माहिती दिली होती. यूनियन आणि इंडस्ट्रीज बॉडीसोबत स्टेकहोल्डर्सने दिलेला सल्ला घेणे महत्त्वाचे आहे. याचा बदल टेक होम सॅलरी आणि कर्मचाऱ्यांवर होतो.

EPF आणि EPS कसं कॅल्क्युलेट होतं?

संघटित क्षेत्रात कर्मचाऱ्यांच्या बेसिक सॅलरीतील १२ टक्के रक्कम ईपीएफ अकाउंटमध्ये जमा केली जाते. याचसोबत नियोक्तादेखील तेवढीच रक्कम जमा करतात. परंतु त्यातील काही रक्कम ही पीएफ आणि काही रक्कम पेन्शनमध्ये जमा होते. नियोक्त्याच्या १२ टक्के रक्कमेतील ३.६७ टक्के रक्कम कर्मचाऱ्याच्या पीएख अकाउंटमध्ये जमा केली जाते. तर ८.३३ टक्के रक्कम पेन्शन स्कीममध्ये जमा केली जाते.