कर्मचारी भविष्य निर्वाह निधी (EPF) ही रिटायरमेंटनंतरच्या आर्थिक सुरक्षिततेची सर्वात विश्वासू बचत योजना मानली जाते. या सेवेचा लाभ देशातील ८ कोटी कर्मचारी घेत आहेत. या ८ कोटी खातेधारकांसाठी महत्त्वाची माहिती. EPFO ३.० नुसार आता पीएफ काढणं जलद झालं आहे. असं वाटत असलं तरी पैसे काढण्यासाठी केलेल्या प्रक्रियेत ५ पैकी १ क्लेम रद्द होण्याची शक्यता आहे. उदाहरणार्थ २०२४ या आर्थिक वर्षात EPFO कडे सुमारे ७९६ लाख खातेधारकांनी पैसे काढण्यासाठी क्लेम करण्यात आले. यापैकी जवळपास १७४ लाख खातेधारकांचे क्लेम विविध कारणांमुळे नाकारण्यात आले. मात्र याची कारणे काय? जाणून घ्या

'या' कारणांमुळे PFचे पैसे काढण्यात अडथळे

हे क्लेम रिजेक्ट करण्याचं सर्वात मोठं कारण म्हणजे आधार, पॅन आणि EPFO रेकॉर्डमधील नावातील फरक, जन्मतारीख जुळत नसणे, बँक खाते व्हेरिफिकेशन किंवा एकापेक्षा अधिक UAN असणे यामुळे अनेक खातेदारकांचे क्लेम रिजेक्ट केल्याची माहिती EPFO ने दिली. तसेच जुनी कंपनी सोडल्यानंतर नवीन कंपनी जॉईन करताना त्याची माहिती अपडेट न केल्यासही क्लेम प्रक्रियेत अडथळे येतात.

PFचे पैसे काढण्यापूर्वी काय कराल?

त्यामुळे EPF सदस्यांनी PFचे पैसे काढण्यापूर्वी आपली KYC माहिती तपासून दुरुस्त करणे आवश्यक आहे. एकच UAN, आधार-पॅनमधील वैयक्तिक माहिती, योग्य बँक खाते आणि मोबाईल क्रमांक यांची खात्री केल्यास भविष्यातील जलद डिजिटल सुविधांचा लाभ सहज घेता येईल. EPFO 3.0 मुळे प्रक्रिया वेगवान होईल, मात्र अचूक माहिती आणि योग्य कागदपत्रे यांचे महत्त्व कायम राहणार आहे.

UPI द्वारे PF कधी काढता येणार?

दरम्यान, UPI द्वारे पीएफ रक्कम काढण्याची सुविधा सुरू होणार असल्याच्या चर्चांनाही वेग आला आहे. मात्र, सध्या अशी कोणतीही सुविधा लागू करण्यात आलेली नाही. EPFO कडून यासंदर्भात कोणतीही अधिकृत तारीख जाहीर करण्यात आलेली नाही. तसेच UPI किंवा एटीएमद्वारे पीएफ व्यवहारांसाठी स्वतंत्र पैसे काढण्याची मर्यादाही निश्चित करण्यात आलेली नाही.