सरकारी कर्मचाऱ्यांसाठी अत्यंत महत्त्वाची बातमी आहे. पंजाबमधील सरकारी कर्मचारी आणि पेन्शनधारकांची आता चांदी होणार आहे. पंजाब सरकारने महागाई भत्त्यात (DA) एकूण ८ टक्के वाढ केली आहे. या निर्णयामुळे कर्मचाऱ्यांचा DA ४२ टक्क्यांवरून ५० टक्क्यांपर्यंत जाणार आहे. ही वाढ दोन टप्प्यांत प्रत्येकी ४ टक्के अशा स्वरुपात दिली जाणार आहे.

मुख्यमंत्री भगवंत मान आणि कर्मचारी संघटनांच्या प्रतिनिधींमध्ये झालेल्या बैठकीनंतर हा निर्णय जाहीर करण्यात आला. बैठकीनंतर मंत्री अमन अरोरा यांनी कर्मचारी नेत्यांसोबत संयुक्त पत्रकार परिषदेत DA वाढीची माहिती दिली. या निर्णयामुळे ४ लाख सरकारी कर्मचारी आणि ३.५ लाख पेन्शनर्स यांना फायदा होणार असल्याचे वृत्त आहे. सरकारच्या तिजोरीवर सुमारे २५० कोटी रुपयांचा अतिरिक्त भार पडण्याचा अंदाज व्यक्त करण्यात आला आहे.

सप्टेंबर आणि ऑक्टोबरच्या सॅलरीत वाढ

उपलब्ध माहितीनुसार DA ची पहिली ४ टक्के वाढ सप्टेंबरच्या पगारात, तर दुसरी ४ टक्के वाढ ऑक्टोबरच्या पगारात दिली जाणार आहे. सप्टेंबरचा पगार १ ऑक्टोबरला मिळणार असल्याने कर्मचाऱ्यांना वाढीव DA चा लाभ त्यावेळी दिसू शकतो.

या बैठकीत फक्त DA चाच मुद्दा नव्हता. १७ जुलै २०२० नंतर भरती झालेल्या कर्मचाऱ्यांच्या वेतनमानाचा प्रश्न, प्रोबेशन काळातील वेतन, जुनी पेन्शन योजना (OPS), २०० रुपयांचा प्रोफेशनल टॅक्स, कंत्राटी कर्मचाऱ्यांचे वेतन आणि संगणक शिक्षकांचे प्रश्न यावरही चर्चा झाली.

मिड-डे मील कर्मचाऱ्यांच्या मानधनात वाढ करण्याची मागणीही कर्मचारी संघटनांनी केली. सरकारने या विविध मागण्यांवर चर्चा करण्याचे आश्वासन दिले आहे. पुढील बैठक ऑक्टोबरच्या पहिल्या आठवड्यात होण्याची शक्यता आहे.

दरम्यान, DA थकबाकीचा स्वतंत्र मुद्दा अद्याप कायम आहे. ८ टक्के वाढीचा हा निर्णय म्हणजेच आधीच्या थकबाकीचा संपूर्ण निपटारा असा अर्थ होत नाही. संबंधित न्यायालयीन आणि इतर मागण्यांवर पुढील चर्चा सुरू राहणार आहे.