राष्ट्रीय महामार्गांवरून नियमित प्रवास करणाऱ्या वाहनचालकांसाठी महत्त्वाची बातमी आहे. रस्ते वाहतूक आणि महामार्ग मंत्रालयाने FASTag वार्षिक सवलतीच्या पाससंदर्भातील नियमांमध्ये बदल केले आहेत. या नव्या व्यवस्थेनुसार, टोल नाक्यापासून 20 किलोमीटरच्या परिसरात राहणाऱ्या स्थानिक रहिवाशांना वार्षिक पास घेता येणार आहे. त्यामुळे दररोज टोल भरून प्रवास करणाऱ्या नागरिकांना दिलासा मिळण्याची शक्यता आहे.

वार्षिक पाससाठी किती शुल्क भरावे लागणार?

नव्या नियमांनुसार, संबंधित टोल प्लाझा नगरपालिका किंवा स्थानिक नागरी क्षेत्राच्या हद्दीबाहेर असल्यास वार्षिक पाससाठी 1,500 रुपये शुल्क आकारले जाईल. तर टोल नाका नगरपालिका अथवा स्थानिक स्वराज्य संस्थेच्या हद्दीत येत असल्यास वाहनधारकांना वर्षासाठी 3,000 रुपये भरावे लागतील. यापूर्वी मासिक पाससाठी वर्षभरात सुमारे 4,320 रुपयांपर्यंत खर्च होत होता. त्या तुलनेत नवीन वार्षिक पास काही पात्र वाहनचालकांसाठी अधिक किफायतशीर ठरू शकतो. मात्र, या सुविधेचा लाभ घेण्यासाठी संबंधित वाहन खासगी वापरासाठी नोंदणीकृत असणे आणि त्यावर FASTag असणे आवश्यक आहे.

प्रत्येक टोल नाक्यावर पास चालणार नाही

या योजनेचा लाभ सर्वच टोल प्लाझावर घेता येणार नाही. वार्षिक पास ज्या विशिष्ट टोल नाक्यासाठी जारी केला जाईल, त्याच ठिकाणी सवलतीचा वापर करता येईल. त्यामुळे प्रवासाच्या मार्गावरील इतर टोल नाक्यांसाठी शुल्क भरावे लागू शकते. तसेच, राष्ट्रीय महामार्ग किंवा द्रुतगती मार्गांवरील टोल वसुली प्रणाली असलेल्या ठिकाणी ही सवलत लागू होणार नाही.

दरवर्षी शुल्कात होणार बदल

मंत्रालयाच्या नियमानुसार, वार्षिक पासच्या शुल्काचा आढावा 1 एप्रिल रोजी घेतला जाणार आहे. त्यामुळे पुढील वर्षांत पासच्या दरांमध्ये बदल होऊ शकतो. एकूणच, टोल प्लाझाजवळ राहणाऱ्या आणि नियमित प्रवास करणाऱ्या खासगी वाहनधारकांसाठी ही योजना फायदेशीर ठरू शकते. मात्र, पास घेण्यापूर्वी संबंधित टोल नाक्याच्या अटी तपासणे आवश्यक आहे.