महाराष्ट्राच्या विधानसभा निवडणुकीत अदानींवरून आरोप प्रत्यारोपांच्या फैरी झडत असतानाच, मतदानाच्या दुसऱ्याच दिवशी अदानी समूहावर अमेरिकी अधिकाऱ्यांना लाच दिल्याचा आरोप करण्यात आल्यानं शेअर बाजारात खळबळ उडाली. यानंतर गौतम अदानींचं मोठं नुकसान झालं आहे. त्यांच्या संपत्तीत जवळपास १२ अब्ज डॉलरची घट झाल्याचे वृत्त आहे.

फोर्ब्ज रिअल टाइम बिलेनियर इंडेक्समध्ये अदानी १७ व्या स्थानांवरून २५ व्या स्थानी घसरले आहेत. अब्जाधीशांच्या यादीतलं त्यांचं स्थान घसरलं आहे. आता त्यांच्याकडील नेटवर्थ ५७.४ अब्ज डॉलर इतके आहे.

शेअर बाजारात अदानी ग्रुपचे शेअर धडामधूम

अदानी समूहावर झालेल्या आरोपांनंतर अदानी ग्रुपच्या शेअरमध्ये घसरण झाली आहे. अदानी एन्टरप्रायझेस, अदानी पोर्ट्समध्ये १५ टक्क्यांची घसरण नोंदवली गेली. अदानी पॉवरचे शेअर जवळपास १३ टक्क्यांनी कोसळले आहे. तर अदानी ग्रीन एनर्जी १७, अदानी एनर्जी सॉल्यूशनच्या शेअर्समध्ये साधारण २० टक्क्यांची घसरण झाल्याचे पाहायला मिळत आहे.

एसीसीच्या शेअर्समध्ये १२.७५ टक्क्यांची घसरण, अंबुजा सिमेंटमध्ये १० टक्क्यांपर्यंत लोअर सर्किट लागले आहे. अदानी विल्मरचे शेअर्स ९.३१ टक्क्यांनी घसरले आहेत. त्याचा एकंदरीत परिणाम हा गौतम अदानी यांच्या एकूण नेटवर्थवर झालेला दिसून येत आहे.

काय आहे आरोप?

अमेरिकेच्या सेक्युरिटीज अँड एक्स्चेंज कमिशनने (SEC) अदानी समूहाचे चेअरमन गौतम अदानी यांच्यावर अमेरिकी गुंतवणूकदारांना फसवणे आणि सरकारी अधिकाऱ्यांना लाच दिल्याचा आरोप केला आहे. या प्रकरणात त्यांचे निकटवर्तीय, अदानी ग्रीन एनर्जी लिमिटेडचे अधिकारी आणि एज्योर पॉवर ग्लोबल लिमिटेडचे काबेनेस यांच्यावर देखील आरोप केले आहेत.

एसईसीच्या तक्रारीनुसार, ज्यांच्यावर आरोप केले आहेत, ते सर्व फेडरल सिक्योरिटीज कायद्यामधील भ्रष्टाचारविरोधी तरतुदींचं उल्लंघन करत होते, असे त्यात नमूद करण्यात आले आहे.