रामू ढाकणे 

छत्रपती संभाजीनगर : छत्रपती संभाजीनगर शहरासह जिल्ह्यात ग्रामीण भागात वादळी वाऱ्यासह विजेच्या कडकडाटासह पावसाने जोरदार तडाखा दिला. शिवाय उन्हाळी पिकांना देखील याचा मोठा फटाका बसला आहे. तर काही ठिकाणी झाडं उन्मळून पडल्याने वीज पुरवठा खंडित झाला. 

राज्यात अवकाळी पावसाचे (Rain) थैमान सुरूच आहे. अनेक भागात अजून देखील वादळी वाऱ्यासह अवकाळी पाऊस होत असल्याने मोठ्या प्रमाणात नुकसान होत आहे. संभाजीनगर (Sambhajinagar) जिल्ह्यात देखील वादळी वाऱ्याने मोठे नुकसान झाले आहे. वादळी वाऱ्यामुळे घरावरचे पत्रे उडून गेल्याने अनेकांचे संसार उघड्यावर पडल्याचे सुद्धा पहायला मिळाले. अचानक आलेल्या या पावसामुळे शेतकऱ्यांची चांगलीच तारांबळ उडाली. ढगाळ वातावरणामुळे उन्हाचा चटका कमी अधिक होत असतानाच उकाडा मात्र कायम आहे. दरम्यान मराठवाड्यात वादळी वाऱ्यासह पावसाचा इशारा हवामान विभागाने वर्तवला आहे.

अवकाळी पावसामुळे शेतकरी (Farmer) आर्थिक संकटात सापडल्याने लवकरात लवकर पंचनामे करून नुकसान भरपाई देण्याची मागणी शेतकरी वर्गातून होत आहे. पैठण तालुक्यातील खादगाव, कडेठान, बिडकिन, पाचोड आणि वडजी या शिवारात शेतकऱ्यांच्या पपई आणि फळ पिकांचं मोठ्या प्रमाणात नुकसान झाले आहे.