पंढरपूर : माळशिरस तालुक्यातील खुडूस येथील केशव सलगर यांनी आपल्या खडकाळ माळरानावर केशर आंब्याची बाग फुलवली आहे. त्यांच्या (Mango) आंब्याची यंदा प्रथमच विविध देशात (Farmer) निर्यात झाली आहे. रसळा आणि स्वादिष्ट केशर आंब्याला स्थानिक बाजारात मोठी मागणी असतानाही आता याच आंब्यांनी‌ परदेशातील खवय्यांना ही चांगलीच भूरळ घातली आहे. (Tajya Batmya)

यंदाचा हापूस आंब्याचे उत्पादन कमी होण्याचा अंदाज आहे. त्यातच तो बाजारात उशिरा येत असल्याने हापूसची जागा आता केशरने घेतली आहे. दुष्काळी सोलापूर जिल्ह्यातील अनेक शेतकर्यांनी केशर आंब्याची लागवड केली आहे. खुडूस येथील शेतकरी केशव सलगर यांच्याकडे सहा एकर केशर आंब्याची बाग आहे. बागेचे योग्य व्यवस्थापन आणि खत आणि पाण्याचे चांगले नियोजन केल्याने आंब्याची झाडे फळांनी लगडली आहेत.

सव्‍वा कोटीपर्यंत उत्‍पन्‍न अपेक्षित

सरासरी प्रति झाड ७० ते ८० किलो इतके उत्पादन मिळण्याची त्यांना‌ आशा आहे. त्यांच्या आंब्याची जागेवर प्रती किलो १२० रूपये दराने विक्री सुरू आहे. त्यांना किमान यंदा १०० टनापेक्षा अधिक उत्पादन अपेक्षित आहे. त्यातून त्यांना अंदाजे १ कोटी २० लाख रूपयांचे उत्पन्न मिळणार आहे. ऊस, केळी या पिकांपेक्षा कमी पाण्यात आणि कमी खर्चात चांगले उत्पन्न आंबा बागेतून मिळू लागल्याने सोलापूर जिल्ह्यातील अनेक शेतकरी आंब्याच्या शेतीकडे वळू लागले आहेत.