कजगाव (जळगाव) : परिसरात परतीच्या पावसाने सोमवारी (ता. १७) जोरदार हजेरी लावली. त्यानंतर दुपारी एकला सुरू झालेला धुव्वाधार पाऊस (Heavy Rain) तब्बल दीड तास सुरू होता. या परतीच्या पावसाने (Cotton) कापूस, मका, ज्वारी आदी पिकांचे नुकसान झाले आहे. कापसाची बोंडे काळी पडत आहेत. उत्पन्नात देखील घट येण्याची चिन्हे आहेत. (Live Marathi News)

सध्या कापूस वेचणी व मका काढणीचा (Jalgaon) हंगाम सुरू असताना सोमवारी (ता. १७) झालेल्या मुसळधार पावसाने कापसाची बोंड निपसून पडली तर अगोदरचा भिजलेला कापूस सुकविण्यासाठी टाकलेला होता, तो देखील पुन्हा पावसाच्या तडाख्यात सापडला. जेमतेम सुकवून काढणीसाठी तयार केलेला मका, ज्वारी हे पुन्हा पावसात भिजल्यामुळे मोठे नुकसान झाले आहे.

यापुर्वीही ढगफुटीसदृश पाऊस

गेल्या महिन्यात १९ ऑगस्टला, नंतर ६ व ७ सप्टेंबरला झालेल्या ढगफुटीसदृश पावसामुळे कजगाव परिसरातील शेतकऱ्यांचे मोठ्या प्रमाणावर नुकसान झाले आहे पुन्हा आज पहाटे व दुपारी झालेल्या धुव्वाधार पावसाने शेतकऱ्यांचा तोंडी आलेला घास हिरावला गेला आहे. दरम्यान, कजगावात मुसळधार पाऊस झाल्यानंतर बसस्थानक आवारात तलाव सदृश परिस्थिती निर्माण झाली होती.

एकिकडे हसू आणि दुसरीकडे अश्रू

सततच्या मुसळधार पावसामुळे खरीप हंगाम वाया जाण्याची परिस्थिती निर्माण झाली असली तरी परिसरातील नदी, नाले तुडुंब भरून वाहत आहे. यामुळे विहिरींची पातळी देखील वाढली, तसेच भविष्यात पाणी उपलब्धता दीर्घ काळ असू शकते, असे शेतकरी जाणकार सांगतात. या पावसामुळे एकिकडे हसू आणि दुसरीकडे अश्रू अशी अवस्था झाली आहे.