पंढरपूर - बोगस खते तयार करून ती शेतकऱ्यांच्या माथी मारणाऱ्या पुणे (Pune) जिल्ह्यातील भोर येथील ग्रीनटेक अ‍ॅग्रो प्राॅडक्टस या कंपनीचा परवाना कृषी विभागाने निलंबित (Suspended) केला आहे. कृषी विभागाच्या कारवाईमुळे बनावट खत निर्मिती करणाऱ्या या कंपनीला चांगलाच दणका बसला आहे. बोगस खतांमुळे दाक्ष बागेचे नुकसान झाल्याचा धक्कादायक प्रकार साम टीव्हीने समोर आणला होता.

हे देखील पहा -

साम टीव्हीच्या बातमीची दखल घेऊन कृषी आयुक्त कार्यालयाचे संचालक दिलीप झेंडे यांनी शेतकऱ्यांची फसवणूक करणाऱ्या या कंपनीचा खत निर्मितीचा परवाना अनिश्चित काळासाठी निलंबित केला आहे. माढा तालुक्यातील बावी‌ येथील विजय मोरे व इतर काही शेतकऱ्यांनी ग्रीनटेक अ‍ॅग्रो प्राॅडक्टस कंपनीची खते खरेरी करून दाक्ष बागेसाठी वापरली होती.

दरम्यान या खतांमुळे या शेतकऱ्यांचे दाक्ष घड जळून‌ गेले होते. यामध्ये या परिसरातील अनेक शेतकऱ्यांचे लाखो रूपयांचे नुकसान झाले आहे. ही बातमी साम टीव्हीने लावून धरल्याने कृषी विभागाने संबंधीत कंपनीच्या खतांच्या नमुने तपासले असता ते बोगस असल्याचे सिध्द झाल्यानंतर ही कारवाई केली आहे.

Edited By - Shivani Tichkule