बुलढाणा : मागील पंधरा दिवसांपासून वातावरणात सातत्याने बदल होत असल्याचे पाहण्यास मिळत आहे. कधी ढगाळ वातावरण तर कधी अवकाळी पाऊस. यामुळे प्रामुख्याने कांदा व भुईमूग उत्पादक शेतकऱ्याला अडचणींचा सामना करावा लागत आहे. अशा वातावरणामुळे उत्पन्नावर परिणाम झाल्याचे पाहण्यास मिळत आहे.

बुलढाणा (Buldhana) जिल्ह्यात गेल्या तीन- चार वर्षापासून सातत्याने अवकाळी पाऊस व गारपिटीने त्रस्त झालेला शेतकरी नैसर्गिक आपत्तीच्या चक्रव्यूहात चांगलाच अडकला आहे. खरिपातील पीक हातातून गेल्यानंतर रब्बी पिकांवर शेतकऱ्यांना मोठी आशा होती. मात्र याही हंगामात शेतकरी दुहेरी संकटात सापडला. अवकाळी पाऊस, गारपीट आणि वारंवार वातावरणात होत असलेल्या बदलामुळे कांदा (Onion) व भुईमुग पिकाच्या उत्पन्नात मोठा फटका बसला आहे. 

खर्च निघणेही अशक्य 

दुसरीकडे पिकाला योग्य भाव नसल्यामुळे शेतकऱ्यांवर (farmer) अस्मानी सह सुलतानी संकट घोंगावत आहे. रब्बी हंगामातील पिकामध्ये देखील होणाऱ्या उत्पन्नातून शेतकऱ्याचा उत्पादन खर्च निघणे अशक्य झाले आहे. त्यामुळे शेतकरी पुन्हा एकदा हतबल होताना दिसून येत आहे.