अक्षय गवळी 

अकोला : राज्यात सध्या अवकाळी पाऊस सुरु आहे. यात अकोल्यात पुन्हा अवकाळी पावसाने हजेरी लावली आहे. (Akola) अकोला जिल्ह्यातल्या तेल्हारा तालुक्यात आज सकाळी अनेक गावांना वादळी वाऱ्यासह अवकाळी पावसाचा (Rain) फटका बसला आहे. यामुळे पिकांचे नुकसान झाले असून नागरिकांची तारांबळ उडाली.

हवामान विभागाने राज्यात वादळी वाऱ्यासह अवकाळी पावसाची शक्यता वर्तविली आहे. त्यानुसार मागील तीन- चार दिवसांपासून अवकाळी पाऊस होत आहे. यात अकोला जिल्ह्यात झालेल्या वादळाने तेल्हारा (Telhara) तालुक्याला आधीच मोठा फटका बसला होता. यानंतर आज सकाळी पुन्हा वादळी वाऱ्यासह पावसाचा जोरदार तडाखा बसला असून शेतात असलेल्या फळबागांना याचा मोठा फटका बसला आहे.

अकोला जिल्ह्यातील तेल्हारा तालुक्यात सकाळी तब्बल ३० मिनिट पाऊस बरसला. सोबत विजेचा कडकडाट सुद्धा सुरू होता. तालुक्यातील हिवरखेड सह कार्ला यासह अनेक गावांना वादळी वाऱ्याचा फटका बसला होता. केळी, पपई यासह अन्य फळबागा  भुईसपाट झाल्या होत्या.