अक्षय गवळी 
अकोला : कापसाचे बियाणे बाजारात मिळत नसल्यानं शेतकरी चांगलाचं आक्रमक होत आहे. एकीकडे कापसाच्या बियाण्यांमुळे शेतकऱ्यांचे हाल सुरु आहेत. मात्र, अकोल्यात बी-बियाणांचा काळाबाजार सुरू असल्याचा प्रकार समोर येत आहे. कापसाचे बियाणे जादा दराने १४०० रुपयांना विक्री करणाऱ्या एका कृषी केंद्रावर कृषी विभागाच्या भरारी पथकाने कारवाई केली. 

अकोला (Akola) जिल्ह्यातील तेल्हारा तालुक्यातील अडसूळ येथील मेसर्स अश्विनी ऍग्रो एजन्सी इथल्या केंद्रावर हा प्रकार निदर्शनास आला आहे. कृषी विभागाच्या अधिकाऱ्यांनी दिलेल्या माहितीनुसार केंद्र चालक रामराव रामचंद्र पोहरे हे बियाणे विक्री केंद्रातून मेसर्स अजित सीड्स उत्पादित अजित १५५, बीजी २ या कापूस बियाण्याची जादा दराने विक्री करत असल्याची माहिती कृषी विभागाच्या (Agriculture Department) भरारी पथकाला मिळाली होती. त्यानुसार मोहीम अधिकारी महेंद्रकुमार सालखे आणि कृषी अधिकारी भरत चव्हाण यांनी डमी ग्राहकाच्या माध्यमातून सदर बियाणे विक्री केंद्रावर छापा टाकला. 

केंद्र चालकावर गुन्हा दाखल 

मेसर्स अजित सीड्स उत्पादित संकलीत (Cotton) कापूस बियाणे वाण अजित -१५५, बीजी २ प्रति पाकीट १४०० रुपये याप्रमाणे जादा दराने विक्री होत करत असताना रंगेहात पकडण्यात आले. कृषी अधिकारी भरत चव्हाण यांनी मेसर्स आश्वनी ऍग्रो एजन्सीचे रामराव पोहरे यांच्या विरोधात विविध कलमान्वये तेल्हारा पोलीस स्टेशनला गुन्हा दाखल करण्यात आला आहे.