अक्षय गवळी 

अकोला : शेतकऱ्याने बांधून ठेवलेल्या बकऱ्यांच्या गोठ्यात शिरून बिबट्याने हल्ला चढविला. यात बांधून ठेवलेल्या तब्बल २० बकऱ्यांचा मृत्यू झाला आहे. अकोला जिल्ह्यातील बाळापूर तालुक्यातील शेळद येथे ही घटना घडली आहे. यात शेतकऱ्याचे मोठ्या प्रमाणात नुकसान झाले आहे. 

अकोला (Akola) जिल्ह्यातील शेळद या गावात भल्या पहाटेच्या सुमारास हि घटना उघडकीस आली. शेतकरी संतोष गाढे यांनी बकऱ्याचे पालन केले आहे. गाढे हे बकऱ्या पालन करून कुटुंबाचा उदरनिर्वाह करतात. त्यांच्यासाठी एक गोठा तयार केला आहे. यात सर्व बकऱ्या बांधून ठेवलेल्या असतात. दरम्यान या गोठ्यात रात्रीच्या सुमारास बिबट्याने प्रवेश करत बकऱ्यांवर हल्ला (Leopard Attack) केला. यात तब्ब्ल २० बकऱ्यांचा मृत्यू झाला आहे. सकाळी संतोष गाढे हे गोठ्यात गेले असता त्यांना गोठ्यात बांधलेल्या तब्बल २० बकऱ्या मृतावस्थेत निदर्शनास आलय. 

सदर घटनेबाबत वन विभागाला माहिती देण्यात आली. यानंतर वन विभागाने घटनास्थळी येत पंचनामा केला. बिबट्याने केलेल्या हल्यामुळे शेतकरी गाढे यांचे साधारण १ लाखाच्यावर नुकसान झाले आहे. वन विभागाने त्वरित नुकसान भरपाई द्यावी व पिंजरा लावून बिबट्यास जेरबंद करावे, अशी संतोष गाढे यांनी केली आहे. दरम्यान बिबट्याच्या हल्ल्यानंतर शेळद गावात दहशतीचे वातावरण पसरले आहे.