Rabbi crop Insurance : रब्बी हंगामातील नुकसानीपोटी पीक विम्याची रक्कम द्या; स्वाभिमानी संघटनेचे आंदोलन

मनोज जयस्वाल 

वाशीम : रब्बी हंगामात झालेल्या अवकाळी पाऊस व गारपीटमध्ये पिकांचे प्रचंड नुकसान झाले होते. यामुळे वाशिम जिल्ह्यातील शेतकऱ्यांना रब्बी हंगाम २०२३-२४ मधील पिक विमा रक्कम मिळावी; या मागणीसाठी स्वाभिमानी संघटनेच्यावतीने जिल्हाधिकारी कार्यालयासमोर धरणे आंदोलन करण्यास सुरवात करण्यात आली आहे. 

वाशिम (Washim) जिल्ह्यात रब्बी हंगाम २०२३-२४ मध्ये जानेवारी ते एप्रिल महिन्या दरम्यान गारपीट व अवकाळी पाऊस झाला होता, यात हरभरा, गहू, तूर आणि कपाशी या पिकाचे मोठ्या प्रमाणात नुकसान झाले होते. मात्र मोठ्या प्रमाणात शेतकऱ्यांचे नुकसान होऊन ही पीकविमा कंपनीकडून अद्याप पर्यंत पीक विमा (Crop Insurance) मजूर करण्यात आला नाही. यात खरीप हंगामात देखील पावसामुळे शेती पिकांचे प्रचंड नुकसान झाले आहे. यामुळे शेतकरी हवालदिल झाले आहेत. 

दरम्यान वाशीम जिल्ह्याच्या शेजारील बुलढाणा जिल्ह्यामध्ये सरसकट पिकविमा देण्याचे कृषी मंत्री धनंजय मुंडे (Dhanajay Mundhe) यांनी मंजूर केले असून त्याच धर्तीवर वाशिम जिल्ह्यातील शेतकऱ्यांना सुद्धा सरसकट रब्बीचा पिक विमा मंजूर करण्यात यावा. या मागणीसाठी स्वाभिमानी शेतकरी संघटनेचे युवक प्रदेशाध्यक्ष दामू अण्णा इंगोले यांनी वाशिमच्या जिल्हाधिकारी कार्यालयासमोर आज धरणे आंदोलन केले.