Soyabean Crop : सोयाबीन पिकावर येलो मोजॅक रोगाचा प्रादुर्भाव वाढला; शेतकरी वर्गात चिंतेचे वातावरण

रामू ढाकणे 

छत्रपती संभाजीनगर : मागील काही दिवसांपासून जिल्ह्यात सुरु असलेल्या रिमझिम पावसामुळे आणि ढगाळ वातावरणामुळे सोयाबीन, मूग आणि कपाशी पिकांवर विविध प्रकारच्या बुरशीजन्य रोगांचा प्रादुर्भाव वाढला आहे. यामुळे शेतकऱ्यांवर महागड्या औषधांची फवारणी करण्याची वेळ आली आहे. 

संभाजीनगर (Sambhajinagar) जिल्ह्यातील अनेक ठिकाणी बहुतांश महसूल मंडळात सोयाबीन पिकावर येलो मोझक या बुरशीजन्य रोगाचा अधिकच प्रादुर्भाव झाल्याने शेतकरी वर्ग चिंतेत सापडला आहे. यामुळे शेतकरी आपली पिके वाचवण्याची धडपड करत आहे. ऐन हंगामात येणाऱ्या काही दिवसात (Soyabean Crop) सोयाबीनच्या शेंगा परिपक्व होऊन अंतिम टप्प्यात आलेल्या आहेत. अशातच येलो मोजॅकच्या रोगामुळे उत्पादनात घट होणार आहे. दरम्यान याकडे कृषी विभागाने तातडीने लक्ष द्यावे आणि शेतकऱ्यांना मार्गदर्शन करावे अशी मागणी शेतकरी करत आहे.

खर्चात अधिक भर 

सोयाबीनसह कपाशी, मूग पिकांवर रोगाचा प्रादुर्भाव वाढला आहे. हि रोगराई कमी करण्यासाठी शेतकरी (farmer) महागड्या औषधाची फवारणी करू लागला आहे. इतके करून देखील बंदोबस्त होत नसल्याने शेतकरी चिंतेत पडला आहे. शिवाय आता अपेक्षित असलेल्या उत्पादनात देखील घट होण्याची शक्यता वर्तविली जात आहे.