Kannad Heavy Rain : कन्नड तालुक्यात मुसळधार पाऊस; शेतातील पिके भुईसपाट, गावात शिरले पाणी

रामू ढाकणे 

छत्रपती संभाजीनगर : संभाजीनगर जिल्ह्यात मागील दोन दिवसापासून सुरू असलेल्या पावसाचा जोर वाढल्यामुळे जिल्ह्यातील शेतकऱ्यांची दाणादाण उडाल्याचे चित्र आहे. यात कन्नड तालुक्यात मुसळधार पाऊस झाल्याने नदी, नाल्याना पूर आला आहे. या पुराचे पाणी गावात व शेतांमध्ये शिरले आहे. पुरामुळे शेतातील पिके पूर्णपणे भुईसपाट झाले आहेत. 

छत्रपती संभाजीनगर (Sambhajinagar) जिल्ह्यातील कन्नड तालुक्यात दोन दिवसांपासून सर्वत्र मुसळधार पावसाने हजेरी लावली आहे. संततधार पावसामुळे नदी, नाले, ओढे दुथडी भरून वाहत आहे. नदीला महापुराचे स्वरूप निर्माण झाले आहे. यामुळे अनेक ठिकाणी गावांचा संपर्क तुटला आहे. तर वरून पाऊस सुरु असल्याने नदी, नाल्यांच्या पुराच्या पातळीत वाढ होत असल्याने हे पाणी शेतांमध्ये शिरत आहे. (Heavy Rain) जोरदार पावसामुळे शेतात असलेले मका, कापूस आणि इतर पिके भुईसपाट झाल्याचे पाहण्यास मिळत आहे. 

गावांमध्येही शिरले पुराचे पाणी 

मुसळधार पावसामुळे काही ठिकाणी पुलावरून पाणी वाहत असल्याने वाहतूक ठप्प झाली आहे. तर दिगाव, खेडी, वाकद, नाचनवेल या परिसरातील नदी, नाल्यांना मोठा पूर आला असून नदीचे पाणी गावात शिरण्यात सुरुवात झाली आहे. अशाच पद्धतीने पाऊस चालू राहिल्यास नागरिकांना अधिक सतर्क राहण्याचे आवाहन प्रशासनातर्फे करण्यात आले आहे.