Lumpy Skin Disease : देहूत 'लम्पी' चा प्रादुर्भाव वाढला, दाेन जनावरांचा मृत्यू; लसीकरण पूर्ण : पशुसंवर्धन विभाग

Maval News : जगद्गुरु संत तुकाराम महाराज यांच्या देहूत अनेक जनावरांना लम्पिस्किन विषाणूची (lumpy skin disease) लागण झाली आहे. प्राप्त माहितीनूसार दोन जनावरांचा मृत्यू झाला. परिणामी शेतकऱ्यांमध्ये भीतीचे वातावरण निर्माण झाले आहे. (Maharashtra News)

लम्पिस्किन विषाणूचा बाह्य कीटकांद्वारे प्रसार होतो. या विषाणूची लागण झाल्याने जनावरांना ताप येऊन दूध उत्पादन घटण्याची शक्यता असते. देहूत जनावरांना तापाची औषध देणे व लसीकरण करणे आवश्यक बनले आहे.

परंतु देहूतील पशुसंवर्धन अधिकारी कधीच उपलब्ध नसल्याने अनेक जनावरांमध्ये लंपीचा प्रसार झपाट्याने होत असल्याचा आरोप देहूतील शेतकऱ्यांनी केला आहे. तसेच पशुसंवर्धन अधिकाऱ्यांना जनावरांना लस देण्यासाठी व औषधोपचार करण्याची मागणी केली जाते मात्र अधिकारी लस उपलब्ध नसल्याचे सांगत टाळाटाळ करत असल्याचा आरोप देखील शेतकऱ्यांनी केला आहे.

याबाबत पशुसंवर्धन अधिकारी यांच्याशी संपर्क साधला असता त्यांनी लसीकरण पूर्ण झाले असून लंपी आटोक्यात येईल असे साम टीव्हीशी बाेलताना सांगितले.

Edited By : Siddharth Latkar