नवी मुंबईत संरक्षक भिंत कोसळली, गाड्या पडल्या खड्ड्यात; सीसीटीव्हीमध्ये धक्कादायक दृश्य कैद

Navi Mumbai News: ऐरोली सेक्टर-20 मध्ये एक धक्कादायक घटना घडली असून, रहिवाशी इमारतीची संरक्षक भिंत अचानक कोसळल्याने परिसरात एकच खळबळ उडाली आहे. ही भिंत कोसळतानाची संपूर्ण घटना सीसीटीव्ही कॅमेरामध्ये कैद झाली असून, व्हिडिओ सोशल मीडियावर वाऱ्याच्या वेगाने व्हायरल होत आहे.

ही घटना(incident) सकाळच्या सुमारास घडली. रहिवाशी इमारतीच्या कंपाऊंडची भिंत काही सेकंदांतच जमीनदोस्त झाली. विशेष म्हणजे, या भिंतीला लागून काही दुचाकी गाड्या उभ्या होत्या. भिंत कोसळल्यानंतर त्या सर्व गाड्या थेट बाजूच्या खड्ड्यात पडल्या. सुदैवाने यामध्ये कोणतीही जीवितहानी झाली नाही, मात्र मोठ्या आर्थिक नुकसानीची शक्यता व्यक्त करण्यात येत आहे.

बांधकामामुळे कोसळली भिंत?

घटनास्थळी जवळच एक नवीन इमारतीचं बांधकाम सुरू आहे. स्थानिक नागरिकांच्या म्हणण्यानुसार, या बांधकामामुळेच भिंतीच्या बाजूची जमीन सैल झाली होती. सततच्या खणकामामुळे भिंतीच्या पायाला धक्का बसला आणि अखेरीस ती भिंत कोसळली. या परिसरातील अनेक रहिवाशांनी याआधीही या बांधकामाबाबत तक्रारी केल्या होत्या, मात्र त्याकडे दुर्लक्ष करण्यात आलं, असा आरोप नागरिकांनी केला आहे.

सीसीटीव्हीमध्ये कैद झालेला थरार

या घटनेचा व्हिडिओ(Video) सध्या सोशल मीडियावर व्हायरल होत आहे. व्हिडिओमध्ये दिसतं की, काही क्षणांपूर्वी सर्वकाही सुरळीत आहे. अचानक भिंतीला झटका बसतो आणि ती संपूर्णपणे खाली कोसळते. काही सेकंदांतच सिमेंटच्या ढिगाऱ्यात दुचाकी गाड्या गायब होतात. एक क्षण असा येतो की, एखादी व्यक्ती जर तिथे उपस्थित असती तर मोठी जीवितहानी झाली असती.

टीप: हा व्हिडीओ सोशल मीडियावर व्हायरल होत आहे. याची पडताळणी झालेली नाही. फक्त माहिती म्हणून आम्ही वाचक-प्रेक्षकांपर्यंत ही बाब पोहचवत आहोत. याचं आम्ही कोणत्याही प्रकारे समर्थन करत नाही.