Mumbai Mayor : मुंबईचा महापौर कोण? भाजप की शिंदेसेनेचा...; देवेंद्र फडणवीसांनी एकाच वाक्यात विषय संपवला

राज्यात २९ महापालिकांच्या निवडणुका झाल्या असल्या तरी, मुंबई महापालिकेच्या निवडणूक निकालाकडं अख्ख्या देशाचं लक्ष लागलं होतं. मुंबईत भाजप-शिंदेंच्या शिवसेनेनं बहुमत मिळवलं आहे. तर ठाकरेंची शिवसेना आणि राज ठाकरेंची मनसे यांच्या युतीनं ७० हून अधिक जागांवर विजय मिळवला. आता मुंबईचा महापौर कोण अशी चर्चा सुरू झाली आहे.

मुंबईत ८९ जागा जिंकून भाजप हा सर्वात मोठा पक्ष ठरला आहे. तर युतीत असलेल्या शिंदेंच्या सेनेने २९ जागांवर विजय मिळवला आहे. आता महापौरपदासाठी दोन्ही पक्षांमध्ये रस्सीखेच सुरू झाली आहे. आमचा महापौर असावा, अशी इच्छा शिंदेंच्या सेनेचे नवनिर्वाचित नगरसेवक आणि काही नेत्यांनी व्यक्त केली होती. त्याबाबत प्रसारमाध्यमांनी मुख्यमंत्री देवेंद्र फडणवीस यांना विचारणा केली असता, काही वाद होणार नाहीत. शिंदे, मी आणि आमच्या दोन्ही पक्षांचे नेते बसून निर्णय घेऊ, असे फडणवीसांनी सांगितले.

मुंबई महापौरपदाबाबत आम्ही बसवून ठरवू. यात महापौर कोण, कधी होणार, किती वर्षे होणार, या सगळ्या गोष्टी शिंदे आणि मी, तसेच आमचे दोन्ही पक्षांचे नेते असे आम्ही सगळे एकत्रित निर्णय घेऊ. काही वाद यात होणार नाही. छान पद्धतीने दोन्ही पक्ष मुंबई चालवून दाखवू, असे फडणवीस म्हणाले.