Nashik : नाशिकमध्ये सिंहस्थ कुंभमेळ्याच्या पर्वाला सुरुवात! राष्ट्रपतींच्या हस्ते भव्य धर्मध्वजारोहण सोहळा

Nashik Simhastha Kumbhmela Today Update नाशिकमध्ये सिंहस्थ कुंभमेळ्याच्या शुभारंभाची उत्सुकता शिगेला पोहोचली असून, आज भव्य धर्मध्वजारोहण सोहळ्याचे आयोजन करण्यात आले आहे. राष्ट्रपती द्रौपदी मुर्मू यांच्या प्रमुख उपस्थितीत हा ऐतिहासिक सोहळा पार पडणार आहे. दुपारी १२ वाजून २ मिनिटांनी धर्मध्वज फडकवण्यात येणार असून, याच क्षणापासून सिंहस्थ कुंभमेळ्याच्या पर्वाला सुरुवात होणार आहे. या ऐतिहासिक क्षणाचे साक्षीदार होण्यासाठी रामकुंड परिसर सज्ज झाला आहे. संपूर्ण परिसरात आकर्षक सजावट करण्यात आली असून, भव्य मंडप, धार्मिक प्रतीके आणि ऐतिहासिक देखाव्यांच्या माध्यमातून कुंभमेळ्याचा आध्यात्मिक वारसा अधोरेखित करण्यात आला आहे.

या सोहळ्याला मुख्यमंत्री देवेंद्र फडणवीस, दोन्ही उपमुख्यमंत्री, आठ मंत्री यांच्यासह अनेक राजकीय आणि प्रशासकीय मान्यवर उपस्थित राहणार आहेत. याशिवाय देशाच्या विविध भागांतून साधू-महंत आणि धर्मगुरूही या सोहळ्यासाठी नाशिकमध्ये दाखल होणार आहेत. दरम्यान, कार्यक्रमाच्या तयारीचा आढावा घेण्यासाठी मुख्यमंत्री देवेंद्र फडणवीस यांनी रात्री उशिरा रामकुंड परिसराला भेट देत व्यवस्थेची पाहणी केली. त्यामुळे आजच्या धर्मध्वजारोहण सोहळ्याकडे संपूर्ण देशाचे लक्ष लागले आहे.