वसईत इमारतीच्या चौथ्या मजल्यावर भीषण आग, कंपनी जळून खाक | VIDEO

वसईच्या तुंगारफाटा येथील गिरीराज कॉम्प्लेक्समधील चौथ्या मजल्यावर एका कंपनीला भीषण आग लागल्याची घटना घडली आहे. ब्रँड वर्क टेक्नॉलॉजी असे कंपनीचे नाव आहे. वसई विरार शहर महानगरपालिकेचे अग्निशमन जवानांनी घटनास्थळी पोहोचून तब्बल तीन तासांनी आगीवर नियंत्रण मिळवले आहे.

या कंपनीमध्ये मोबाईलचे साहित्य तसेच पॉवरबँकची बॅटरी बनवली जात असल्याची प्राथमिक माहिती समोर आली आहे. कंपनीमध्ये कागदी पुठ्ठे होते आणि या पुठ्ठ्यांना अचानक आग लागली आणि आगीचा भडका उडाला. कंपनीला लागलेल्या आगीचे कारण अद्याप स्पष्ट झालेले नाही असे पालिकेचे अग्निशमन जवानांनी सांगितले. मात्र लागलेल्या आगीमध्ये कंपनीचे मोठे नुकसान झाले आहे.