Tariff War : व्यापार युद्ध पेटलं, अमेरिकेनं चीनवर १०४ टक्के टॅरिफ लावला

अमेरिका आणि चीन यांच्यातील व्यापारातील तणाव पुन्हा एकदा तीव्र झाला. अमेरिकेने चीनमधून आयात होणाऱ्या सर्व वस्तूंवर तब्बल १०४% टॅरिफ (आयात शुल्क) लावण्याचा निर्णय घेतला. आज, ९ एप्रिलपासून नवा टॅरिफ लागू होणार असल्याची माहिती व्हाइट हाउसने दिली. या निर्णयामुळे चीनला मोठा आर्थिक फटका बसण्याची शक्यता व्यक्त केली जात आहे.

दोन्ही देशांमधील व्यापारी युद्ध आता नव्या टप्प्यात पोहोचले आहे. या टॅरिफमुळे अमेरिकन बाजारात चिनी वस्तूंच्या किमती वाढण्याची शक्यता आहे, तर चीनमधील निर्यात क्षेत्रावर मोठा परिणाम होऊ शकतो. १० एप्रिलपासून चीनने अमेरिकेन वस्तूंवर ३४ टक्के टॅरिफ लागू केला होता. चीनने अमेरिकन वस्तूंवरील ३४% टॅरिफ मागे घेतला नाही, तर कठोर पावले उचलली जातील. असा इशारा अमेरिकेचे राष्ट्राध्यक्ष डोनाल्ड ट्रम्प यांनी चीनला इशारा दिला होता. या धमकीनंतर अवघ्या ४८ तासांतच ट्रम्प प्रशासनाने हा ऐतिहासिक निर्णय जाहीर केला. ट्रम्प यांनी म्हटले आहे की, "जे कोणी अमेरिकेविरुद्ध प्रतिशोधात्मक कारवाई करेल, त्याला त्याहून अधिक कठोर प्रत्युत्तर दिले जाईल. व्यापारात अन्याय सहन केला जाणार नाही."