Weather Update: मराठवाड्यात वादळी पावसाचा हाहाकार, २ आठवड्यात २७ जणांचा मृत्यू, ३९१ जनावरे दगावली | VIDEO

मराठवाडा विभागात गेल्या १७ दिवसांपासून अवकाळी पावसाने अक्षरशः धुमाकूळ घातला आहे. सततच्या वादळी वाऱ्यासह गारपीट आणि विजांच्या कडकडाटामुळे जनजीवन विस्कळीत झालं आहे. ३ मेपासून सुरू झालेल्या या हवामान बदलामुळे शेतकऱ्यांच्या हातातोंडाशी आलेल्या पिकांचं मोठं नुकसान झालं आहे.

या १७ दिवसांमध्ये वीज पडून २७ जणांचा दुर्दैवी मृत्यू झाला असून, ३९१ जनावरे दगावली आहेत. याशिवाय ४ हजारांहून अधिक हेक्टरवरील उन्हाळी आणि बागायती पिकांचं अतोनात नुकसान झालं आहे. अचानक आभाळ भरून येणे, वीजांचा प्रचंड कडकडाट आणि रोज पडणारा पाऊस यामुळे बळीराजा अक्षरशः हतबल झाला आहे.

शेतकऱ्यांची परिस्थिती अत्यंत बिकट झाली असून शासनाने तत्काळ पंचनामे करून नुकसानग्रस्तांना योग्य तो आर्थिक मदत दिली जावी, अशी मागणी जोर धरू लागली आहे.