Pune Z Bridge: पुणेकरांसाठी महत्वाची बातमी! झेड ब्रिज महिनाभरासाठी राहणार बंद, पर्यायी मार्ग कोणते?

पुण्यातील प्रसिद्ध झेड ब्रिज वाहतुकीसाठी बंद राहणार आहे. पुलावरील विस्तार सांधे म्हणजेच एक्सपेंशन जॉइंट्स आणि बेअरिंग्ज बदलण्याचे कामासाठी रात्री ११ वाजता ते सकाळी ७ वाजेपर्यंतचा कालावधी निवडण्यात आला. पुणे शहरातील डेक्कन परिसराला पेठ भागाशी जोडणारा स्वर्गीय काकासाहेब गाडगिल पूल ज्याला 'झेड ब्रिज' म्हणून ओळखले जाते. हा पूल दुरुस्तीच्या कामासाठी एक महिना बंद ठेवण्यात येणार आहे. नागरिकांनी या काळात पर्यायी मार्गाचा वापर करावा, असे आवाहन महापालिकेने केले आहे. पुणे महानगरपालिकेने शहरातील वाहतूकदृष्ट्या अत्यंत महत्त्वाच्या या पुलाच्या दुरुस्तीचे काम १० एप्रिलपासून सुरू करण्याचा निर्णय घेतला आहे. हे काम ९ मेपर्यंत चालणार असून या कालावधीत रात्रीच्या वेळी पुलावर वाहतूक पूर्णपणे बंद राहील. शहराच्या दैनंदिन वाहतुकीत महत्त्वाची भूमिका बजावणारा हा पूल दुरुस्तीसाठी तात्पुरता बंद ठेवण्याचे नियोजन करण्यात आले आहे.