Pune Rain: पुणेकरांचे पाण्याचे टेन्शन मिटलं! पुण्यात ४ दिवसांपासून तुफान पाऊस, खडकवासला धरणाची पाणी पातळी वाढली

पुण्यात पावसाचा धुमाकूळ सुरू आहे. पुण्याच्या खडकवासला धरण क्षेत्रात गेल्या ४ दिवसांपासून तुफान पाऊस पडत आहे. या धरणातून मुळामुठा नदीत विसर्ग सुरू करण्यात आला आहे. आज दुपारी १२ वाजता खडकवासला धरणाच्या नवीन मुठा कालव्यातून ५०० क्युसेक्सने पाण्याचा विसर्ग सुरू करण्यात आला आहे. खडकवासला धरण क्षेत्रात गेल्या ४ दिवसापासून मुसळधार पाऊस सुरू आहे त्यामुळे खडकवासला धरण क्षेत्रातील चारही धरणांमध्ये पाणीसाठा वाढत असून काही प्रमाणात पाणी मुळा मुळा नदीत सोडले जात आहे.

पुण्यात २४ तासांत धरणसाखळीत ३.७८५ टीएमसी पाण्याची भर पडली आहे. खडकवासला धरणसाखळीच्या पाणलोट क्षेत्रात सुरू असलेल्या मुसळधार पावसामुळे गेल्या २४ तासांत चारही धरणांमध्ये मिळून ३७८५ एमसीएफटी (३.७८५ टीएमसी) पाण्याची आवक झाली आहे. त्यामुळे धरणसाखळीतील एकूण उपयुक्त पाणीसाठा वाढून १०.६८ टीएमसी (३६.६३ टक्के) झाला असून, अवघ्या १३ तासांत २.३६ टीएमसी पाण्याची भर पडल्याने धरणांतील साठा झपाट्याने वाढत आहे.