Pune : जॉबसाठी काय पण! बेरोजगारीचं विदारक वास्तव, मगरपट्यात नोकरीसाठी एक किलोमीटरची रांग; पाहा VIDEO

Pune Unempolyment News : देशातील बेरोजगारीचे भयाण वास्तव दाखवणारा व्हिडीओ सोशल मीडियावर व्हायरल होत आहे. हा व्हिडीओ पुण्याच्या मगरपट्टा भागातला आहे असा दावा केला जात आहे. तेथील एका नामांकित आयटी कंपनीने वॉक-इन इंटरव्ह्यू ठेवला होता. नोकरीसाठी मुलाखत देण्याच्या उद्देशाने तरुणांनी रांगा लावल्या. मुलाखतीसाठी तब्बल एक किलोमीटरपर्यंत रांगा लागल्याचे व्हिडीओमध्ये पाहायला मिळते. नोकरी मिळेल या आशेने राज्याच्या कानाकोपऱ्यातूनच नाही, तर देशभरातून बेरोजगारांनी गर्दी केल्याची माहिती समोर आली आहे. विद्येचे माहेरघर म्हणून पुण्याला ओळखले जाते. पण मागील काही वर्षात पुण्याची 'आयटी शहर' अशी नवी ओळख निर्माण झाली आहे. पुणे आणि परिसरात अनेक आयटी कंपन्या आहेत. विविध राज्यातून अनेक तरुण नोकरीसाठी पुण्याला येत असतात. अशात जर एखाद्या कंपनीने ओपन प्लेसमेंट ठेवले असेल तर त्या ठिकाणी या तरुणांची गर्दी होत असते.