Pawar Family: मोठी बातमी! पवार कुटुंब एकत्र येणार? आज किंवा उद्या पवार कुटुंबीय निर्णय घेणार?

अजित पवारांच्या निधनानंतर एकीकडे मंत्रिमंडळात फेरबदल होणार असल्याच्या चर्चा सुरू असताना दुसरीकडे पक्ष एकत्रित करण्याबाबतचा लवकरच अंतिम निर्णय पवार कुटुंब एकत्र बसून घेणार असल्याची माहिती समोर आली आहे. दोन्ही पक्ष एक करण्याबाबत लवकरच पवार कुटुंबिय एकत्रित बसून निर्णय घेण्याची शक्यता आहे. शरद पवार याबाबत अंतिम निर्णय घेणार असल्याची सूत्रांची माहिती आहे. पक्ष एकत्रित करण्याच्या आधीच्या चर्चेत केवळ अजित पवार राष्ट्रवादी काँग्रेस पक्षाकडून तर शरद पवारांच्या पक्षाकडून सुप्रिया सुळे, स्वत: शरद पवार, जयंत पाटील, खासदार अमोल कोल्हे, शशिकांत शिंदे सहभागी होते. अजित पवार नसल्यामुळे आता पवार कुटुंबीय एकत्रित बसून निर्णय घेणार आहेत.

अजित पवार यांचे विमान अपघातामध्ये निधन झाले. २८ जानेवारीला सकाळी पावणे नऊ वाजता ही घटना घडली. अजित पवार हे बारामतीला सभांसाठी येत होते. पण बारामतीमध्ये पोहचण्यापूर्वीच त्यांचे विमान कोसळले. विमान कोसळ्यानंतर मोठा स्फोट झाला आणि विमानाचे अनेक तुकडे झाले. या विमान अपघातामध्ये अजित पवार यांच्यासह ५ जणांचा मृत्यू झाला. या घटनेमुळे फक्त पवार कुटुंबीय नाही तर संपूर्ण महाराष्ट्राला मोठा धक्का बसला.