Bapu Bhegade : मावळमध्ये महायुतीला धक्का; बापू भेगडेंचा अजित पवार गटाला राम-राम, अपक्ष निवडणूक लढवणार

विधानसभा निवडणुकीच्या रणधुमाळीत अजित पवार यांना मावळ विधानसभा मतदारसंघातून मोठा धक्का बसला आहे. राष्ट्रवादी अजित पवार गटाचे बापू भेगडे यांनी प्रदेश उपाध्यक्ष पदाचा राजीनामा देत अपक्ष निवडणूक लढवण्याचा निर्णय घेतला आहे. तशी माहिती त्यांनी पत्रकार परिषद घेऊन दिली आहे. त्यांच्या या बंडखोरीने महायुतीलला मोठा धक्का बसला आहे. त्यामुळे आता विधानसभेत मावळ विधानसभा मतदारसंघात आमदार सुनील शेळके विरुद्ध बापू भेगडे अशी लढत पाहायला मिळणार आहे.

महायुतीमध्ये मावळ विधानसभा मतदारसंघावरून रस्सीखेच सुरू होती. अखेर आज विद्यमान आमदार सुनील शेळके यांना उमेदवारी जाहीर झाल्यानंतर त्यांच्याच पक्षातील बापू भेगडे यांनी पत्रकार परिषद घेऊन भूमिका स्पष्ट केली आहे. राष्ट्रवादी काँग्रेस पक्षाचा स्थापनेपासून सदस्य आहे. मोठ्या नेत्यांच्या नेतृत्वाखाली मी तयार झालो. माझं कुटुंब एकनिष्ठ काम करत राहिलं. परंतु, मला अजित पवारांनी मावळ मधून उमेदवारी दिली नाही. विद्यमान आमदार सुनील शेळके यांना उमेदवारी देण्यात आली. त्यामुळे मला खूप दुःख झालं अशी खदखद बापू भेगडे यांनी व्यक्त केली आहे. राष्ट्रवादी काँग्रेस पक्षाच्या प्रदेश उपाध्यक्ष पदाचा राजीनामा देत असल्याचं म्हणत राष्ट्रवादीला राम- राम ठोकला आहे. त्यामुळे मावळ विधानसभा मतदारसंघात सुनील शेळके विरुद्ध बापू भेगडे अशी लढत होणार आहे निश्चित.

Edited By Rakhi Rajput