Nagpur News: नागपूरच्या पबमध्ये टेबलच्या वादातून राडा; तरुणाला बेदम मारहाण | VIDEO

नागपूर: शहरातील शिवाजीनगर भागातील एका पबमध्ये काही दिवसांपूर्वी झालेल्या मारामारीचा व्हिडीओ सध्या सोशल मीडियावर मोठ्या प्रमाणात व्हायरल होत आहे. या व्हिडीओत एका तरुणाला तीन-चार जण मिळून मारहाण करत असल्याचे स्पष्टपणे दिसत आहे. हा प्रकार गेल्या आठवड्यात घडल्याचं सांगितलं जात आहे.

पबमधील टेबलच्या ताब्यावरून सुरू झालेला हा वाद हाणामारीपर्यंत गेला. विशेष म्हणजे, या पबमध्ये अल्पवयीन मुलांना सर्रासपणे प्रवेश दिला जात असल्याचं स्थानिकांकडून सांगितलं जात आहे. इतकंच नव्हे तर, या पबच्या रूफटॉपवर खुलेआम मद्यपान केलं जात असल्याचंही बोललं जात आहे. मात्र, अजूनपर्यंत या संदर्भात अंबाझरी पोलिसांनी कोणतीही ठोस कारवाई केल्याची माहिती समोर आलेली नाही.

या प्रकारामुळे नागपूर शहरातील संस्कृतीवर पुन्हा एकदा प्रश्नचिन्ह उपस्थित झालं आहे. अशा ठिकाणी अल्पवयीन मुलांना सहज प्रवेश मिळत असल्याने अनेकजण नशेच्या आहारी जात असल्याची चिंता व्यक्त केली जात आहे. नागरिकांनी अशा प्रकारांवर पोलिसांनी तातडीने लक्ष देण्याची मागणी केली आहे.